Psalms 69:10-34

¹⁰Tom ani aimi karogo kapasam ale inang kaola ko munan karosam mu kariimet aga balu maguwusan.

¹¹Ani angamang batagoso se aimi karur tugusam ale amone guari pagoso, mu nuna aninga gusirsan.

¹²Kariimet lage te ilu biguwusan ale aninga ko munakasan, se yu aora nana ale ngualara ko kari mu wur memek ani ago ko ilusan.

¹³Bare O Yawe, aninga guranek nikate betesam. Ni ani ago ko ninguru kuesam, ale tom ni keta ko ikiwasam mu te aninga guranek koma aisuko; ni aga sangaru toko den kalo beterem mu te aga sangaru toko.

¹⁴Ni aninga tagi bataguru to se ani lom gege ningi me sarenga namarikko; ni aninga bitaru se kager kari memek me aga maguwumonko.

¹⁵Ni aga sangaru se lom me aga tagirokko; ni aga sangaru se yu du biya ningi me sarengik, ale mutim ningi me kua namarikko.

¹⁶O Yawe, agiring ilupko, nika kua aisa biya mu ko ningo te aga sangaruko; nika gemang lila ningo mu te kema gurugu aisuko.

¹⁷Biring gurugu nika ura kari me tuiko; ani ikup biya ningi kaperem se ni tairate tai aga sangaruko.

¹⁸Ni aninga te tairate tair ale aga sangaruko; kager kari memek nuguting te aga bataguru toko.

¹⁹Kari aninga balu maguwusan mu ni maingkala nunga iki saperem; aninga aip karogo kapasan ale dolara aisisan mu ni nunga ikiem.

²⁰Bala se ikia suen la beteman mu aninga angamang motam batogam se aga sokel menaram; ani kariimet bo aga sanguk ale den ningo aisuokko i maem, bare mena.

²¹Nuna inang memek wore naikko aisiman; ale yu ko kuerem mu, yu memek mu aisiman.

²²Aninga angamang mu, nunga amilmil inang bibiya ko tom mu geraguk ale nononga tom memek iwita nunga taliparuk se dagulamonko.

²³Ni nunga nomotam tirom awur se sor me arigimonko; nunga nosokel menawur se ikup gimon ale tara tara la lagamonko.

²⁴Nika gemang memek nungumik kuali bitarko; se nika gemang magara mu nunga maguwurok se mena namamonko.

²⁵Se nunga kawam digo mu kariimet bo me ta ningi bagarukko; nunga wonong tuagu mu sirsir pagukko.

²⁶Mu awuk, kariimet saki nunga memek koma nungarem mu agotala nunga bita maguwusan; ni yaman nungarem se lot gawir giman mu nunga den siaman balsan ale ikup nungarsan.

²⁷Ni nunga memek koma ikup ko ikup nungaruko; ale nunga bitar se nika kariimet ningo nunga por ningi me utu kapamonko.

²⁸Nunga nunup marak ningo pempem bagara ko batoga ningi mu siwu saparko; ale nunga nunup mu kariimet diram ningo nunga nunup karogo me bitarko.

²⁹Bare O Kaem, ani ikup yaman tawun biya giem; ni aninga bataguru to ale aga bitaruko.

³⁰Ani Kaem ko wur iluwek ale nup patawurikko; ani amilmil te ko nup biya mu ko balikko.

³¹Ani uwutata bitirik mu Yawe aninga wur te nup patawura ko munan mu ko amilmilarukko; nu tama bita tuata ko munan mu tawun biya me ko kueso.

³²Se kariimet ikup giwasan mu arigimon ale amilmilamonko; Kaem nongomang tua ko kariimet mu aking sokel iru tamonko.

³³Mu awuk, Yawe kariimet nungumik mel mena mu nunga wosenga ikiso, ale ko kariimet talipara ningi mu me nunga kuamili saposo.

³⁴O taiti gomang se ali lilim, Kaem nup patawuralko; gagi suen la se mel suen la gagi ningi mu betelatala;