Psalms 65:5-12

⁵O Kaem, anananga Sangaru Ta Kari, ni kiwem duap duap te nagiring ilusam ale nanga bataguru tasam. Ali lilim ko kariimet se gagi batoga te ta wore nikate la nunga loagara ikia betesan.

⁶Nika sokel aora mu te duruk bibiya mu nunga nungem, ale mu te nika sokel biya mu wetang saperem.

⁷Ni gagi tamun ko kuring nirung kapawaram mu manem se kutek mam; ale kariimet nunga kager ko munak nirung mu uwutatala menawurem.

⁸Kariimet awar bibiya bagasan mu nika kiwem bibiya imi arigisan ale biririkasan; kariimet worem bausa te se worem kapara te mu wur ilusan ale amilmilasan.

⁹Ni ali imi lilim la ko sinar tasam ale yu tusam se ali welang gemaso; nika yu suen la mu nungumik maraka namara bo mena; se nika kariimet na inang karogo terong ma sapasan. Nika gemang uwutata aniram se ni te uwutata beterem.

¹⁰Ni tuwik te ningam yu tusam se ali mu yu karogo, buta se yu mu ali bugulik tuso se na inang terong la barasoso.

¹¹Nika ningo mu nangarsam se na inang sor magoso; se kariimet nunga inang te gia ko kitak se korokem mu mel suen la kuring aratu saposo.

¹²Sor palunga wosesel biya mu te sirsir ningo barasoso; se duruk luan amilmil kelagoso.