Psalms 62:2-10

²Nu kota aninga manga aora, se aninga saonga kari; nu aninga manga gek am, se ani me soror maikko.

³Se nina amaru aninga mora maguwura sowore beteralko? Ani kar parasaram ale dalelawoso iwita bagasam, bare awuk, am aga itakuawural se dagulu parasarikko e?

⁴Nunguningta, nuna aninga ura nup ago te bagasam wore te am aga menawumonko nunguningkiri karogo kaesan; nuna nuguring guang la angimik ko ningo balsan ale munan umu ko ninguru amilmilasan, bare nongomang motam ningi mu am maga namarikko balsan.

⁵Bare ani Kaem kota aga sangukko mu ko iki se angamang lila te bagarikko; aninga angamang motam ko sangam mu nukote tasam.

⁶Nu kota aninga manga aora, se aninga saonga kari; nu aninga manga gek am, se ani me soror maikko.

⁷Kaem kota aninga sangarso, ale kota nup biya aisiso; nu aninga manga aora, se aga yumura kuwim.

⁸O aga kariimet, Kaem kote la ira sanami se lagaralko; nengemang motam lilim la kausalko; mu awuk, nu anananga yumura kuwim.

⁹Kariimet nunup mena mu marir nagiring te pus masan se aratu nama menaso iwita; se kariimet nunup ago mu mel nunguning bo mena, am ko dora wore iwita; se skel te ta nunga awumon mu nungumik ikup mena, wete guyak gotek.

¹⁰Buta se nina tere daong te saki nunga mel tagiral ale me ninimi te patawuralko; se munan umu te mel gemaral, mu me te ira sanamaralko.