Psalms 38:5-21

⁵Lot angimik te mu kiri moman ale siring kapa gilingisan; mu aninga ngualara owore ko koma.

⁶Ikup ninguru aga iram agarak kaparam se am aliti biya bagasam; ani woremkalal maiya am niara ma te la baga lagasam.

⁷Aninga asusuru yaman mu tama iwita barasoso, aninga angimik lilim la yukuwa saparam.

⁸Ani menarem ale angimik sokel mena saparam; ani angamang motam yaman karogo nia kika lagasam.

⁹O aga Biya, aninga angamang motam mu ni ari saperem; aninga niara kikira mu ni ko iki saperem.

¹⁰Ani angamang motam daung daung maso ale angimik sokel menaso; amotam tiromorom iram se sor arigekko me terong.

¹¹Aga lot gawir ewere te se, aga gue suan alo se aga sikisaki alo aga dulursan; aga bagara suan alo mu ago ko awar biya bagasan.

¹²Kariimet aninga momon se kuerikko mu aninga dagarok kira gilingisan, se kariimet ani yaman aisimonko mu aga maguwumonko balu gilingisan; nuna ani ago ko bala guruga wore me ta bita to arigisan.

¹³Bare ani mu kari bo dogowa mena se den me ikiso iwita bagasam; kari bo kuring mena se munakarukko me terong iwita bagasam.

¹⁴Nunguningta, ani kari bo dogowa den me ikia iwita bagasam; kuring mena se den koma me balukko iwita bagasam.

¹⁵O Yawe, ani ni ko ko kimi bita lagasam; O Kari Biya, aninga Kaem, ani ni agiring ilupko kimi bita lagasam.

¹⁶Ani nika manem, “Ani ikup te dagulek mu aga kager kari alo mu me nungarki sager se aga eremon ale amilmil te nunumi me patawumonko,” maem.

¹⁷Se aitak mu ani dagulekko pingi arem; aga yaman mu angimik te am aniso.

¹⁸Ani memek beterem mu ni kema te apusam; ani ikup beterem mu ko angamang ninguru batagoso.

¹⁹Aninga kager kari alo mu suen biya se nosokel aora biya; nuna ago ko me kuesan bare mu kumik duap bo mena.

²⁰Nuna ani munan ningo betesam mu ko koma mu munan memek mu agate betesan; nuna ani munan ningo betesam wore ko ani agarak barimasan.

²¹O Yawe, ni me aga bitarko; O aga Kaem, me aga bitar ale awar biya bagerko.