Psalms 37:7-38

⁷Yawe koma te kutek me ale, nu kimi tui sager se nu kiwem arukko; kariimet memek nunga kiwem memek ningi mel ningo ningo gimon se nungarki, mu ko ikia me ka morukko.

⁸Gemang me magaruk, se gemang magara ko munan mu biring tuiko; ikia me ka morukko, mu awuk, munan umu maga namara ko lage.

⁹Kariimet munan memek bitawara mu mena namamonko; bare awiriya Yawe kote la loaga lagoso mu ali Kaem balam mu te baga lagarukko.

¹⁰Tom me maiyuk se, kariimet memek bitawara mu yumu namamonko; ni nunga loager bare me nungarkiko.

¹¹Bare kariimet nunumi karogo kapasan, mu ali imi tamon ale amilmil te lila te, te bagamonko.

¹²Kariimet memek mu kariimet ningo diram mu nunga maguwumonko ko ikia kalosan ale nogore usisan se gigek maso;

¹³bare Kari Biya kariimet memek bitawara mu nunga gusiso, mu awuk, nu ikiso nononga tom mu taiwoso.

¹⁴Kariimet memek mu baenat woyesan ale daga wol tagisan ale kariimet kituwura se nungumik mel mena wore nunga momon se kapamonko; ale kariimet nunga munan ningo diram mu karogo nunga momon se kuemonko geragasan.

¹⁵Bare nunga baenat mu nongota nunga nokosopas atumokko; se nunga daga wol karogo mu koma kilikilik maukko.

¹⁶Ningo diram la baga se kimik mel suen mena ago mu ningo, mu kiwem memek bitawara mu nunga melmasak suen biya kia saparam;

¹⁷mu awuk, Yawe kariimet memek nunga sokel mu maguwurokko, bare nu kariimet ningo diram mu nunga sinar taukko.

¹⁸Yawe kariimet nungumik te den bo mena mu pempem nunga bitarso, ale nunga melmasak balu nungaram mu eng am nononga pempem anirukko.

¹⁹Ikup ko tom te mu nuna me ta memek arigimonko; karak tom te mu nuna na suen biya se me ta tukunangamonko.

²⁰Bare kariimet memek alo mu mena namamonko; Yawe ilak barimara ko kariimet alo mu giarum ko wakala yawara iwita, nuna mena namamonko - tama bur iwita mena namamonko.

²¹Kariimet memek alo mu bo ko mel tasan agi mu, koma me nungarsan; bare kariimet ningo diram betera alo mu, amilmil te melmasak kariimet saki nungarsan;

²²kariimet Yawe marak nungarso mu ali imi tamonko, bare awiriya nu buguwak kalo nungarso mu memek tamonko.

²³Yawe kariimet bo ko munan ko amilmiloso mu sokel tuso;

²⁴se nu ikup arigok wore nu me ta dagulokko, mu awuk, Yawe kota ko kuting te iluwok se nu me dagulokko.

²⁵Aninga kulak te tai aitak garuk arem, mu ani Yawe kariimet ningo diram mu buring gurugu nungaram se me nungarkem; agi nunga kuriang inang ko ngatanga ngatanga geragaman se me nungarkem, mena.

²⁶Nuna nongomang motam ningo te kariimet saki amilmil te melmasak nungarsan; nononga kuriang marak ningo tasan.

²⁷Nina munan memek nibiring tual ale munan ningo karo tualko; mu asele nina tom pempem ningo la baga se lagaralko.

²⁸Mu awuk, Yawe kariimet kiwem ningo betesan mu nunga kueso, ale ko kariimet diram la karo tusan mu me buring gurugu nungarso. Nu nunga bituok se ningo la pempem baga lagamonko; bare kariimet memek alo nunga kuriang gue mu maga namamonko.

²⁹Kariimet ningo diram bitawara mu ali tamon ale te butata baga lagamonko.

³⁰Munan ningo diram la bagara ko kariimet mu nuguring te ikia sinar den aratukko, ale nunga nungamili te den ningo wore la balmonko.

³¹Nononga Kaem ko den mu nononga nongomang motam ningi aniso; nunga aolak mu ningo se diram la.

³²Kari memek alo mu yumusan ale kariimet ningo diram wore nunga kimi bitawasan, nunga momon se kuemonko ko baga lagasan;

³³bare Yawe mu kariimet ningo diram mu nunga bitiruk se me memek tamonko, bare den te nunga betemon mu nu nunga sangukko.

³⁴Yawe ko la ikia bita se ko munan karo tuiko. Se nu nika sanguk se ni ali mu kotam awurko; nu kariimet memek alo mu nunga karo saparuk mu ni motam te arikko.

³⁵Ani munan memek betera ko kari bo arigem, nu tam biya bo ali welang te aragam tarigiso iwita tarigiram se arigem.

³⁶Bare tom me maiyam se apalagaya namaram se ko kuwim ipi aniso; ani ko loagerem, bare me arigem.

³⁷Kariimet nungumik te den mena se ningo diram la betesan mu nungarkalko; nuna nongomang lila te saki alo nongorak baga lagasan, buta se yawarakala baga se lagamonko.

³⁸Bare memek betera ko kariimet mu yawarakala me bagamonko, nuna maga sapamonko.