1Dawudaa bɛtina, bɛti baane kuntigin xa.
2Alatala, n bata n luxun i yi. I nama tin n yi yarabi! N natanga i ya tinxinyana fe ra.
3I tuli mati n na, i yi n xunba iki sa! Findi n yigiya gɛmɛn na, e nun n makantan yinna.
4N ma gɛmɛ gbeen nun n ma yinna nan i tan na. Ti n yɛɛ ra, i yi n maxaran i xinla a fe ra.
5N natanga na luti ratixin ma n yɛɛ ra, bayo i tan nan n xun mayɛngɛma.
6N bata n niin so i yii, n xunba Alatala, lannaya Ala.
7N bata ne raɲaxu naxanye suxure fufafune batuma, koni n tan yigin saxi Alatala nan fari.
8N sɛwama nɛn, n ɲaxan i ya hinanna fe ra, bayo, i bata n ma tɔrɔne to, i n sɔndɔmɛna sɔxɔlɛn kolon.
9I mi n soxi n yaxune yii, koni i n xɔrɔyaxi nɛn.
10Alatala, kininkinin n ma, amasɔtɔ n tɔrɔni. N bata xadan wugɛ. Sunun bata n niin nun n fatin natagan.
11Sunun bata n ma dunuɲa yi gidin ɲan, wugan yi nde ba n siin na. N fangan bata ɲan n yi n ma tɔrɔne fe ra. N xɔnne bata yelefu ayi.
12N yaxune birin, katarabi n dɔxɔ bodene ma, ne n nayarabima. N xɔyine bata gaxu n yɛɛ ra, e na n to kiraan xɔn ma, e e gi n yɛɛ ra.
13E birin bata ɲinan n xɔn ma alo n faxaxin na a ra. N bata lu alo fɛɲɛ kalaxina.
14N bata yaxu wuyaxi kɔyɛkɔyɛn xuiin mɛ, gbalona n nabilinni. E feene yitɔnma lan n faxa feen ma.
15Alatala, n tan yigin saxi i tan nin, n naxa, “I tan nan n ma Ala ra.”
16N ma waxatine i sagoni. N natanga n yaxune ma naxanye n bɛsɛnxɔnyama.
17I nɔrɔn xa godo i ya walikɛɛn ma, n nakisi i ya hinanni.
18Alatala, n bata n xui ramini i ma, i nama tin n yi rayarabi. Ala xa muxu ɲaxine yarabi, Ala xa e dunduxin nagodo laxira yi.
19Na wule xɛlɛne radundu, na wasode yandaxine birin naxanye fala ɲaxin tima tinxin muxune ma.
20I ya nɛmaan makabɛ, i bata naxan namara i yɛɛragaxu muxune xa! Muxun birin yɛtagi, i ya fanna fima ne ma nɛn naxanye luxunxi i yi.
21I bata e yigiya i fɛma, i e kantanma muxune fe yitɔnxine ma. I bata e ratanga wule xɛlɛne ma.
22Barikan bira Alatala xa! N yi rabilinxi yaxune ra waxatin naxan yi n yɛngɛ xinla ma, a yi a hinanna yita n na.
23N ma gaxuni, n yi a fala, n naxa, “I bata n kedi i yɛtagi.” Koni n to n xuiin namini i ma malina fe ra, i yi n ma mayandi xuiin mɛ.
24Ɛ tan tɔgɔndiya muxune birin xa Alatala xanu! Alatala dɛnkɛlɛya muxune ratangama nɛn, koni a yandadene sare fima nɛn alo a lan kiinde.
25Ɛ tan naxanye birin yigi saxi Alatala fari, ɛ sɛnbɛn so, ɛ bɔɲɛ ragidi.
