Psalms 18:19-28

¹⁹Nu aninga saongam ale kuwim ningo te aga beteram; nu aninga kueram ale aga bataguru tam.

²⁰Ani munan laili karo tuem, se Yawe koma ningo aisam; ani memek bo me beterem, se nu marak ningo aisam.

²¹Ani noko munan diram la karem; ani munan memek bo me beterem, ale abiring me gurugu tuem.

²²Ani pempem la noko munan mu angama sengem ko aniso, se kuring me kulukurukasam.

²³Ani noko motam te angimik ikup bo mena; ani aimi ko ninguru sinar tokasam, ale memek bo me bitakasam.

²⁴Se Yawe aninga munan laili arigam ale koma ningo aisam; mu awuk, ani noko motam te diram la bagakasam.

²⁵O Kaem, awiriya ni ko ko kua kaposo, mu ni ka kua kapara ko munan mu kote betesam; se awiriya munan ningo beteso, mu ni ka munan ningo kote betesam.

²⁶Awiriya munan diram la beteso, mu ni munan diram mu ilak betesam; bare awiriya munan daeldel bita lagoso, mu ni aguwaya nu bitarko mu nikate mu am mel gotektir.

²⁷Mu awuk, ni awiriya numi karogo kaposo, mu ni sangaru tasam; bare ni awiriya numi patawuso, mu ni ilak kapasam.

²⁸Nigita, O Yawe, ani nikinang aisisam; aga Kaem, ni aninga tiromorom bataguru sapasam ale nikim aisisam.