Psalms 145:3-16

³Yawe mu ko nup biya, se nup patawusan mu am diram; noko nup biya mu ko iki kutuwura ko mu me terong.

⁴O Kaem, kuriang gue aitak mu, aking kuriang gue bo udagi mu, nika ura bibiya beterem mu nunga manarmonko; nika kiwem bibiya duap duap mu ko nunga manaru gurugumonko.

⁵Nuna nika nikim sokel garagar se nip biya mu ko balmon, se ani mu nika kiwem mu ko ikia to se lagarikko.

⁶Kariimet nika ura sokel garagar ago beterem mu ko balmon, se ani mu ni mel bibiya beterem mu ko balu pagikko.

⁷Nuna nika ningo suen biya mu ko amilmilamon ale wur amilmil ilumon, ale nika munan ningo diram la mu ko amilmil kelagamonko.

⁸Yawe mu gomang lila se gomang bataga ko Kaem; nu gomang tairate me magoso, se nu bo ko kua tuata ko munan karogo terong mam.

⁹Yawe kariimet suen la nongorak ningo; nu mel suen la nungam mu ko gomang bataga karogo.

¹⁰O Yawe, ni buruk kausik mel gotektek suen la nunga nungem se nama taiwasan, mu nika nip patawumonko; nika kariimet mu suen la amilmil kisimonko.

¹¹Nuna nika kingdom nikim garagar mu ko balmon, ale nika sokel garagar mu ko munakamon,

¹²se kariimet suen la nika kiwem sokel ago bibiya beterem mu ko ikimon, ale ka kingdom nikim ago yawarakala mu ko ikimonko.

¹³Nika king ko bagara mu kumik menara mena, se ni king ko tom pempem baga lagerko. Yawe mu noko den kaolam mu diram la karo saposo, ale ko kiwem suen la mu gomang lila te beteso.

¹⁴Nu awiriya ikup ningi bagoso mu sangarso; nu awiriya dagulam mu patawuso se sanamoso.

¹⁵Melmasak suen la marak bagasan mu amilmil te nikate loagasan; ale inang ko kuesan mu ni inang nungarsam.

¹⁶Ni kiting ulaluwusam, ale kariimet mel i ko tukunangasan mu nungarsam.