Psalms 119:37-146

³⁷Ni agarkiwer se ali ewere ko mel, kumik ningo bo mena mu, amotam me gurugokko; nika den te daiga bagara ningo aisuko.

³⁸Ani nika ura kari se ni anapeya kariimet ni bowa ningi bagasan mu nunga balem mu ani agotala aisuko.

³⁹Nika den te aga sangaru se me dolirikko, mu awuk, nika den mu ningo se diram.

⁴⁰Ani nika kausa ningo wore ko kua lagasam! Se ka ningo nuam mu te marak iru aisuko.

⁴¹O Yawe, nika kua nangara yawara mu aga kasuru ale balem butata aga sangaruko.

⁴²Ani nika den te ira sanamasam, ale awiriya aga balu maguwuso mu koma balu tuekko.

⁴³Aninga loagara mu nika den nunguning mu te la loaga lagasam; buta se aga sangaru se nika den nunguning balu se lagarikko.

⁴⁴Ani pempem la nika karo tua ko den mu butata karo tui se lagarikko.

⁴⁵Ani nika kausa den ningo mu karo tusam owore te se, ani kiwem bo ko dungan iwita me ta bagarikko, mena.

⁴⁶Ani nika den mu king nongoma te am balu pagik, ale kiwem betesam umu ko me ta dolirikko.

⁴⁷Ani nika den suen la ninguru ko amilmilasam, mu awuk, ani nunga kuesam.

⁴⁸Ani ninguru nunga kuesam ale nunga amilmilasam, ale aga bagara te mu ko iki gurugu se lagarikko.

⁴⁹Ni den ka ura kari ani agarak balem mu ko kamili me saparukko; mu awuk, den borta ani te ira sanamasam ale sokel tasam.

⁵⁰Tom ani ikup yaman ningi kapasam mu nika den sangam aisiso se ningo la bagasam.

⁵¹Nunumi patawura ko kariimet mu ago ko nongomang bataga bo mena, dolara den te ninguru aga maguwusan, bare ani nika karo tua ko den mu me ta abiring tusam.

⁵²O Yawe, ani nika den balu beterem se ani lagoso mu ko angamin ares maso, se umu ani angamang motam sangam tuso.

⁵³Tom kari memek bitawara mu nika den kulukursan, mu ani angamang ikuwoso.

⁵⁴Ani apareyate baga se wore, nika den mu ani wur te ilu lagasam.

⁵⁵O Yawe, ani tirom ningi nika nip ko angamin ares maso, se ani nika karo tua ko den mu ko iki gurugu lagasam.

⁵⁶Se marak ningo angimik te kaparam, mu awuk, ani pempem nika den karo tui lagasam.

⁵⁷O Yawe, ni keta aninga mel suen biya; ani nika den karo tuekko aga ikia kalem.

⁵⁸Ani angamang motam lilim la te ka isarsam, nika den te balem uwutata gemang lila aisuko.

⁵⁹Aninga kiwem kasik la ko ikia taem, ale angamang nika den karo tuekko betesam.

⁶⁰Ani tom me aga kiarukko, am tairate la nika den karo tuekko.

⁶¹Memek betera ko kariimet mayang te aga talipamon ta wore, ani nika karo tua ko den ko me ta angamili saparukko.

⁶²Ani tirom mung luan barasasam ale nika den ningo dirkiriyam mu ko amilmil kisisam.

⁶³Ani awiriya nika nguangasan mu nongorak suanta, se awiriya nika kausa ningo mu karo tusan, mu nongorak suanta tala.

⁶⁴O Yawe, ali imi nika kua ana nangara ko kiwem karogo terong mam; buta se ka den ningo aga kasuruko.

⁶⁵O Yawe, ni ka den balem butata, ani ka ura kari agate ningo la bitarko.

⁶⁶Nika ikia sinar se tutera ningo aga kasuruko, mu awuk, ani nika den ko angamang ningi nunguning aram.

⁶⁷Ni ani bu me aisa la mu ani memek bitakasam, bare aitak ani nika den karo tusam.

⁶⁸Ni mu ningo, se ni anapeya betesam mu ningo la; buta se nika den aga kasuruko.

⁶⁹Nunumi patawura alo mu ani ago ko den kawel balsan, bare ani angamang motam lilim te nika den karo tusam.

⁷⁰Nononga nongomang motam au kaparam se nunga ikia ngualaram, bare ani nika den ko ninguru amilmilasam.

⁷¹Ani bu taem mu aninga ningo ko, mu awuk, bu umu te asele ani nika den mu ari ko ikiem.

⁷²Den ni kiring te arataso mu aninga te mu mel aromemek, ali imi ko manga se ko mel ningo ningo mu nunga kia saparam.

⁷³Ni kiting te kupkup ilu biguwurem ale aga nungem; ni aga ikia sinar awur se, ani nika den ko ikiekko.

⁷⁴Awiriya nika nguangasan mu, ani agarkamon ale amilmilamonko, mu awuk, ani aga loagara mu am nika den te diram bita lagasam.

⁷⁵O Yawe, ani ko ikisam, nika den mu ningo dirkiriyam, se nika diram la karo tua ko munan te ani bu aisem.

⁷⁶Ani nika ura kari agarak den kalem uwutata, nika kua nangara kumik menara mena mu te, angamang motam tagi patawurko.

⁷⁷Nika gemang lila ani ais se ani te bagarikko, mu awuk, ani nika karo tua ko den ko ninguru amilmilasam.

⁷⁸Nunumi patawura ko kariimet alo den kawel kumik duap mena ani ago ko balsan, mu ko koma memek nungaru se dolomonko; bare ani mu nika den mu ko iki gurugu se lagarikko.

⁷⁹Awiriya nika den ko nguanga se iki karo tusan mu aningate taimon, se ani nika den umu nunga kausek se ikimonko.

⁸⁰Aninga angamang biya mu ni aga sangaru se nika den karo tuekko, ale kiwem umu te mu ani ko dolara me taikko.

⁸¹Ani nika saonga ko kimikam la lagerem ale adera angimik sokel menaram, bare ani nika den te ira sanamasam.

⁸²Ani nika den wore ko nunguning ko amotam bita se maem, “Ni amaru te aga sangaruko ya?” maem.

⁸³Ani mu pulut gigira tama motam te kaetma se marakawara owore iwita, bare ani nika den mu ko angamili me saposo.

⁸⁴Tom awila nunguningkiri ani, nika ura kari, kimi bita lagarikko? Ni amaru te kari aga bita maguwusan mu nunga maguwurko?

⁸⁵Nunumi patawura alo, ani te aga ilumonko, mutim ilu betesan, mu nika karo tua ko den kiasan.

⁸⁶Nuna aninga bita maguwusan mu kumik duap bo mena, buta se ni aninga sangaruko; mu awuk, nika den mu mel biya se mel nunguning.

⁸⁷Nuna katirta ali imi te aga menawumonko, bare ani nika den mu me ta patawu sapasam.

⁸⁸Nika kua nangara ko munan te, aga sangaru se marak baga se nika den karo tuekko.

⁸⁹O Yawe, nika den mu kumik menara mena; sokel karogo duruk wonong te butata aniso.

⁹⁰Nika diram la karo tua ko munan mu, tom pempem la kuriang luan gue gue te butata aniso; ni ali lilim la nungem burangerem se yager nukuri ago aora biya butata aniso.

⁹¹Nika den uwutata aniram tai aitak, mu awuk, melmasak suen la mu nika ura dungan betesan.

⁹²Nika karo tua ko den mu ani amilmil aisiso. E ani me ko amilmilasam le mu, tom ani ikup arigem mu te ani angimik lilim ago maga namerem la le.

⁹³Buta se ani nika den mu me ta angamili saparukko, mu awuk, borta te ni aninga ilukuawurem se ani bagasam.

⁹⁴Aga sangaruko, mu awuk, ani nika; se nika den karo tui lagerem.

⁹⁵Memek motam alo mu aga momon se kuerikko kimi bitawasan, bare ani nika den ko ikia ninguru bitirikko.

⁹⁶Melmasak ningo ningo suen la mu ko tom tukunang gotek, bare nika den mu du biya se ulal biya, se kumik menara ko tom mena.

⁹⁷Ani nika karo tua ko den mu ninguru ko kuesam! Ale tom pempem ko iki gurugu lagasam.

⁹⁸Nika den mu pempem ani agarak baga se ikia sinar ninguru aisiso, se memek motam alo mu ani agarak me terong maman.

⁹⁹Aninga kitigot wiram ale aga ikia sinar aram se aga kausa kari nunga kiarem, mu awuk, ani nika den ko iki gurugu lagasam.

¹⁰⁰Aninga ikia sinar mu kariimet garuk nunga ikia sinar kiaram, mu awuk, ani nika kausa ningo mu karo tusam.

¹⁰¹Ani lage memek suen la abiring tuem, mu awuk, ani nika den karo tuekko.

¹⁰²Ani nika den mu me ari daleluwurem, mu awuk, ni keta aninga kausem.

¹⁰³Beras ko ningo mu yamanam, bare nika den mu ani agiring te am yamanam nunguningkiri!

¹⁰⁴Ani nika den mu te ikia ningo tasam; buta se ani tuang memek mu suen la abiring tuem.

¹⁰⁵Nika den mu aninga galep, lage aga kasurso, ale aninga lage nikinang tuso.

¹⁰⁶Ani den bo kalem ale sokel tuem mu iwita, ani nika den diram la karo tuekko maem.

¹⁰⁷O Yawe, ani ikup yaman giem terong mam; nika den ningo mu te marak sokel iru aisuko.

¹⁰⁸O Yawe, angamang motam lilim la te ka nip patawusam mu to ale, nika den aga kasuruko.

¹⁰⁹Tom suen la lage memek mu aga maguwurokko taiso, bare ani nika karo tua ko den mu me ta angamili saposo.

¹¹⁰Kariimet memek motam alo mu ani ago ko bawang bo beteman, bare ani nika den mu me abiring tuem.

¹¹¹Nika den suen la mu aninga mel ningo, pempem agarak anirukko; den mu aninga angamang motam amilmil tuso.

¹¹²Aninga angamang motam mu anapeya aratuk ta wore, nika den karo tui se lagarikko aniso.

¹¹³Ani kariimet ikia ilagala te bagasan mu ani me nunga kuesam, bare ani nika karo tua ko den ko kuesam.

¹¹⁴Ni aninga manga gek am se aga karem, se aninga loagara mu nika den ningi la bita lagasam.

¹¹⁵Nina memek betera ko kariimet, tagi talko, se ani aga Kaem ko den karo tuekko.

¹¹⁶Nika den kalem umu te aga ilukuawur se, ani marak bagarikko; ani nikate la loaga lagasam, umu te aga sangaru se ani me ipi loaga laga dolirikko.

¹¹⁷Aga sinar to se ani memek bo me arigekko; ani nika den mu la ko ikia to se lagarikko.

¹¹⁸Ni awiriya nika den me karo tusan mu nunga biriruwusam; mu awuk, nuna ikia kawel mu te nongota nunumi kuluruwasan.

¹¹⁹Ni ali imi ko kariimet memek mu mel memek iwita nungarkasam ale nunga gi warsam; buta se ani nika den ko kuesam.

¹²⁰Ani nika ko nguangasam ale angimik lilim barowara maso; ani abugura kulukursam ale nika den ko ikia to lagasam.

¹²¹Ani kiwem ningo diram se yawarakala mu beterem, buta se ni aga bitaru se memek betera alo mu me aga bita maguwumonko.

¹²²Ani nika ura kari, aga ningo ko sinar toko; aga bita to se nunumi patawura alo mu me agarak kapamonko.

¹²³Ni den ningo dirkiriyam kalem owore te ani loaga lagasam, ale ni aga sangaru toko loaga laga, amotam dagulam.

¹²⁴Buta se nika kua nangara kumik menara mena wore ko munan te aga sangaru ale nika den aga kasuruko.

¹²⁵Ani nika ura kari; aga ikia sinar awur se, ka den ko sinar arikko.

¹²⁶O Yawe, ni kiwem bo bitarko, mu awuk, nika den kulukurman.

¹²⁷Nunguningta, nika den mu mel ningo ningo kia saparam, mel yawara nunguningkiri ta wore am kia saparam tala, se ani ninguru ko kuesam.

¹²⁸Nunguningta, nika den mu aninga kiti guruguso, se kiwem kawel suen la mu ani me ta ko kuesam.

¹²⁹Nika den suen la mu yawarakala; buta se ani karo tusam.

¹³⁰Nika den apusan mu nikim nangarso, ale kariimet den umu me ko ikia ta wore ikia sinar nungarso.

¹³¹Ani nika den ninguru ko iki kutuwurekko angamang nia lagoso.

¹³²Kema gurugu ale gemang lila aisuko; kariimet awiriya nika kuesan mu ni uwutata nongote betesam.

¹³³Nika den te aninga aolak diram la kiti gurugu se kiwem memek bo ta ani me aga kiarukko.

¹³⁴Kariimet memek alo nuguting te aga sangaru to se ani nika den karo tuekko.

¹³⁵Kema gurugu ale gemang motam ani ka ura kari aisu ale nika den aga kasuruko.

¹³⁶Aninga amononge mu yu ko kapawoso, mu awuk, kariimet nika karo tua ko den me karo tusan.

¹³⁷O Yawe, ni mu ningo dirkiriyam nunguningkiri, se nika den mu diram la.

¹³⁸Nika den suen la nangarem mu am ningo diram, se anananga ningo ko mel biya nunguningkiri, kari bo ko suwik saparukko mel bo mena.

¹³⁹Angamang magara mu tama ko kaniwoso, mu awuk, kager kari memek nika den mu mel yam ko betesan.

¹⁴⁰Ni ka den mu me gurugusam patawusam se ani arigem mu am ningo, se yawara nunguningkiri; se ani nika ura kari ninguru ko kuesam.

¹⁴¹Ani mu kituwura se agarki maguwusan, bare ani nika den mu me ta ko angamili saposo.

¹⁴²Nika ningo dirkiriyam la bagara ko munan mu kumik menara mena, se nika karo tua ko den mu den nunguning.

¹⁴³Ikup aga iram se angamang daung daung maso, bare nika den mu ani amilmil aisiso.

¹⁴⁴Nika den mu ningo dirkiriyam la pempem aniso; aninga ikia sinar awur se ani te bagarikko.

¹⁴⁵O Yawe, angamang motam lilim te ka arusam; agiring ilup se nika den karo tuekko.

¹⁴⁶Ani nikate aisam, aga sangaru to se ani nika den karo tuekko.