Psalm 51:2-19

²Panya kutjupa-aṟaṉa walytjangku kuliṟa kura mukuringkula palyalpai. Munuṉa kutjupa-aṟa watarkungku palyalpai palya-palku kuliṟa. Kaṉi kura nyanga uwankaranguṟu ngayunya pungkunytja wiyangku wantima.

³Uwa, ngayuluṉatju kura palyantjatjanungku kuliṟa walytjangku ngurkantananyi, munuṉa nyuntula kuliṟa wantinytjatjanungku rawangku kulilpai munuṉa tjituṟu-tjituṟuripai.

⁴Mayatja, ngayulu panya kura palyaṟa nyuntunya puḻkaṟa kuraṉu, panya painuṉin, kaṉa kuliṟa wantira pampuṉu, kan ngayunya tjukaṟurungku kuranmananyi, munuṉin palya wiyaṉi.

⁵Uwa, ngayulu iṯinguṟu alatjiṯu kura nyinangi. Panya kura alatjiṯuṉi ngunytjungku tjuningka kanyiningi.

⁶Ka nyuntu panya mukuringanyi ngayulu tjukaṟurungku unngu kulintjaku. Palulanguṟuṉi wanyu ngayunya unngu nintila nyuntu kulintjitja tjuṯa, kaṉa kuliṟa nyuntu mukuringkunytja kutju wangaṉarangku palyalku.

⁷Uwa, ngayulu kura palyantjitjanguṟuṉi kalypangku wantima munuṉi tjukaṟurunma. Kaṉa pala palulanguṟu palya mulapa nyinama.

⁸Wanyuṉi tjakultjura nyuntu ngayunya kalypangku wantinytjatjanungku, kaṉa kuliṟa pukuḻari. Puḻkaṟaṉa kuṉṯaringu, panya kura puḻka mulapa nyuntu ngayula utinu. Kaṉi wanyu piṟuku pukuḻmanama kura nyanga palula tjanalanguṟu nyuntu ngayunya kalyapangku wantinytjatjanungku.

⁹Uwa, nyuntu nintingku ngayunya nyangu kura palyannyangka. Palu nyakunytjatjanungku wanyu ngayunya kalypangku wantima pungkunytja wiyangku, munu kura nyanga uwankara ngayulu nyuntula tungunpungkula palyantjitjaku watarkurima rawangku kulintja wiya.

¹⁰Mayatja God, wanyuṉi kulintja kampa kutjupara, munuṉi tjukaṟurula nyuntula kutju wangaṉarangku kulintjaku.

¹¹Palu nyuntulanguṟuṉi paiṟa iyantja wiyangku wantima. Munu Kurunpa Miḻmiḻnga ngayulanguṟu mantjilwiyangku wantima, panya paluṟu ngayunya wankaṟu kanyini.

¹²Panya ngaṉmanypaṉa pukuḻpa mulapa nyinangi nyuntu ngayula tjungu nyinara alpamilannyangka. Kaṉi wanyu maḻakungku pukuḻmanama panya ngaṉmanyitja puṟunypa nyinanytjaku. Munuṉi kuṉpula, kaṉa nyuntula kutjungka wangaṉarangku kulinma.

¹³Alatji nyuntu ngayunya pukuḻmankunyangkaṉa tjakultjunkuku aṉangu panya nyuntunya wantipai tjuṯangka. Kaya ngayulu puṟunypaṯu tjana kuliṟa kuṉṯaringkuku munuya aṟuringkula pitjaku nyuntunya tjukaṟurungku waṉantjikitja.

¹⁴Mayatja God, nyuntu kutjungku ngayunya wankaṟunkuku. Panya ngayulu kurangku iluntanu, katju ngaḻṯuriwa munuṉi kalypangku wantima pungkuwiyangku. Kaṉa aṉangu tjuṯangka tjakultjura katungku mirara wangkara nyuntu ngayunya wiṟungku tjukaṟuruntja.

¹⁵Uwa Mayatja, ngayunya wangkanytjaku nintila, kaṉa nyuntunya mirawaṉira waḻkunma.

¹⁶Tjinguṟuṉa ngayuku kuranguṟu kuka tjiipi katima pitjilta pungkula pauṟa muluruṟa ungkunytjikitjangku nyuntunya. Palu ngayulu ninti panya nyuntu pukuḻarinytja wiya kuka kutju pungkula ungkunyangka.

¹⁷Palu ngayulu kurunpa tjaṟuringkula piiwiyaringkunyangka kutju nyuntu ngayuku pukuḻariku. Munuṉi paiṟa iyantja wiyangku wantira kanyilku.

¹⁸Palu wanyu ngaḻṯuringkula alpamilala aṉangu nyanga Jerusalemala nyinanytja tjuṯa wall-pa para-ngaṟala waṉantja piṟuku palyantjaku panya ngaṉmanytju piḻuntankunytja.

¹⁹Nyuntu tjinguṟu alatji alpamilannyangkaya nyuntumpa aṉangu tjuṯa tjukaṟuru nyinaku, munuya mulamulangku kuranguṟu piiwiyaringkula kuka katiku pungkula pauṟa muluruṟa ungkunytjikitjangku nyuntunya. Ka nyuntu palumpa tjanampa puḻkaṟa pukuḻariku.