A Umana Kakailai 51:2-19

²Una dalu vakakit vue kaugu varpiam, Ma una dur vue kaugu nirara kan iau.

³Tago iau nunure kaugu lavur varpiam, Ma kaugu nirara i tur vatikai ta ra luaina matagu.

⁴Iau tar pait ra kaina piram, ia kaka piram, Ma iau tar pait nam ba i bilak ta ra luaina matam, Upi una takodo ba u tatata, Ma una langalanga ba u varkurai.

⁵Ea, di ga kava iau ta ra bilak na mangamangana, Ma tinagu i ga lalau pa iau ma ra varpiam.

⁶Ea, u mainge ra dovot na bala, Kari una vaminana iau ara ta ra nuknukigu iat.

⁷Una vagomgom iau ma ra isop, ma ina gomgom,, Una dalu iau, ma ina pua kakit ma ra kabang pata.

⁸Una tul tar iau, ba ina tadav ra gugu ma ra gina, Upi ra urugu na lagar mulai, nina ba u ga bubur gigi diat.

⁹Una ive ra matam kan kaugu lavur nirara, Ma una pun vue kaugu lavur varpiam par.

¹⁰Una vaki tar ra gomgom na nuknuk tagu, God; Ma una pait vakalamane ra takodo na ninunuk tagu.

¹¹Koko una okole vue iau kan ra matam, Ma koko una tak vue ra takodo na tulungeam kan iau.

¹²Una tul tar mule ra gugu tagu, a gugu ta kaum valavalaun, Ma una maravut iau ma ra pok na nuknukigu.

¹³Ona damana, ina tovo tar kaum lavur mangamangana ta ra umana tena varpiam, Ma ra umana tena vana rara diat a vana tapuku piram.

¹⁴God, u God a vunapai kaugu valaun, Una valaun iau kan ra vartakun na vardodoko; Ma ra karameagu na manga kakailai ure kaum mangamangana takodo.

¹⁵Luluai, una papa ra bul na ngiegu, Ma ra ngiegu na vaarike kaum pite varpa.

¹⁶Tago pa u kaina upi ra tinabar; Gala u mainge, gala ina ga tar ia tam; Vakir u ga ta ra tinabar di tun tar ia.

¹⁷Ba i takunuan ra nuknuk i dat, ia nam ra tinabar God i mainge, Ba i takunuan ma ba i nukpuku ra bala i vevet, God, pa u pidimuane.

¹⁸Una mal Sion vardada ma kaum bo na mamainga. Una liplip bat Ierusalem.

¹⁹Damana una gugu ta ra umana tinabar di tul tar ia ma ra takodo na mangamangana, Ma ta ra tinabar di tun tar ia, a kidoloina ka; Damana da tul tar ra umana bulumakau ta kaum uguugu na vartabar.