1Davidalu inma nyangatja walkatjunu Inmaku Mayatjaku inma inkapai tjuṯangku kitangka tjungu inkanytjaku. Mayatja God, aṉangu manta winkitjangkula nyuntunya kulini nyuntu panyan mayatja witulya puḻka nyinanyi wiṟu mulapa munun ilkaṟingka pitalytji puḻkangku uwankara alatjiṯu irnyaṉi.
2Kaya tjitjingku iṯingku kuḻu nyakula inma inkara nyuntunya mirawaṉipai. Ka nyuntumpa kuraringkupai tjuṯangku nyuntunya puṯu analpai nyuntu witulya puḻkangku markunnyangka.
3Panya mungangkaṉa ilkaṟi ira-nyakupai nyuntu panya paluntja, panya kinaṟa, kililpi kuḻu nyuntu tjunkunytja.
4Munuṉa nyakula kulilpai, “God, nyuntu panyan puḻka mulapa, ka panya nganaṉa aṉangu tjuṯa minga puṟunypa. Palu nyuntu nganaṉanya ngaḻṯunytjungku kulilpai, Munulanyan aṯunymaṟa kanyilpai.
5Panya nyuntu nganaṉanya tjunu puḻka mulapa nyinanytjaku nyuntula itingka pitalytji puḻkatjara.
6Munu panyan nganaṉanya tjunu nyuntu panya paluntjitja uwankara mayatjarira kanyintjaku.
7Panya nyuntu nganaṉanya tjunu uwankara aṯunymaṟa kanyintjaku tjiipi puluka inuṟa tjuṯa kuḻu,
8munu tjuḻpu ilkaṟingka para-ngaṟapai tjuṯa munu uṟu unngu para-ngaṟapai tjuṯa kuḻu.”
9Mayatja God, aṉangu manta winkitjangkula nyuntunya kulini nyuntu panyan mayatja witulya puḻka nyinanyi wiṟu mulapa.
