Psalm 51:2-19

²Ohlla ma koluk luk nukewa Ac aknasnasyeyula liki ma koluk luk!

³Nga akilen tafongla luk, Ac ma koluk luk oan in nunak luk pacl e nukewa.

⁴Nga oru ma koluk lain kom, aok lain kom mukena, Ac oru ma su tia wo ye motom. Ke ma inge fal kom in nununkeyu. Oasr suwohs lom in lisyula.

⁵Nga nuna koluk oe ke len se nga isusla ah me; Liki pacl se nga srimetak, nga nuna mwet koluk.

⁶Orekma suwohs ac inse pwaye pa kom lungsum; Nwakla nunak luk ke lalmwetmet lom.

⁷Aknasnasyeyu ke sak hyssop, ac nga fah nasnasla; Oulyula ac nga fah fasrfasr liki snow.

⁸Lela nga in lohng pusren engan ac insewowo; Finne kom tuh itungyuwi ac kunausyula, Nga ac sifil pacna enganak.

⁹Afinya motom liki ma koluk luk Ac eela ma koluk luk nukewa.

¹⁰Kom in oru insiuk in nasnas, O God, Ac ase sie ngun sasu ac pwaye in nga.

¹¹Nikmet lisyula liki ye motom; Nikmet eisla ngun mutal lom likiyu.

¹²Sifilpa ase nu sik engan su tuku ke molela lom, Ac oru tuh nga in insewowo in akos kom.

¹³Na nga fah luti mwet koluk ke ma kom sapkin, Ac elos ac fah foloko nu yurum.

¹⁴Sruokya moul luk, O God, ac moliyula, Ac nga fah engan in fahkak ke suwoswos lom.

¹⁵Leum, kasreyu tuh nga in ku in kaskas, Ac nga fah kaksakin kom.

¹⁶Kom tia lungse mwe kisa; Kom funu lungse, nga lukun orek kisa; Kom tiana insewowo ke mwe kisa firir.

¹⁷O God, mwe kisa luk uh pa inse pusisel — Kom ac tia pilesru sie inse pusisel su auliyak.

¹⁸O God, kulang nu sin Zion ac kasrel; Sifilpa musaeak pot Jerusalem.

¹⁹Na kom fah insewowo ke mwe kisa pwaye Ac ke mwe kisa firir lasr; Ac cow mukul fah kisakinyuk fin loang lom.