Psalm 136

1

3

6

8

13

19

20

23

40

46

51

61

63

91

121

131

133

136

146

¹Mayatja Godanyala waḻkunma, panya paluṟu wiṟu mulapa.

²Paluṟu kutju god puḻka mulapa kutjupa uwankarangka waintaṟa alatjiṯu. Kala palunya kutju waḻkunma.

³Paluṟu kutju mayatja puḻka mulapa mayatja kutjupa uwankarangka waintaṟa. Kala palunya kutju waḻkunma.

⁴Paluṟu kutjungku kutjupa kutjupa puḻka mulapa palyalpai witulya puḻkangku.

⁵Paluṟu nintipuka mulapa munu palulanguṟu nintingku ilkaṟi paluṟa kutjupa kutjupa tjuṯa tjunu.

⁶Paluṟu manta lipiṟa tjunu uṟungka katu.

⁷Paluṟu paluṉu tjiṉṯu munu piṟa, munu tjiṉṯu tjunu kaḻaḻa irnyantjaku, munu piṟa kililpi tjunu mungangka irnyantjaku.

¹⁰Paluṟu Itjipanya nguraṟa tjuṯaku katja ngaṉmanyitja tjuṯa iluntanu. Munu paluṟu Israelkunu tjuṯa witulya puḻkangku pakaltjingaṟa katingu ngura Itjipalanguṟu.

¹³Paluṟu uṟu ini Tjuṉa-tjuṉatjaranya tjaraṉu Israelkunu tjuṯa itipirinytjaku, munu tjananya nguṟurwanungku katingu. Munu paluṟu uṟungka iluntanu Piiṟanya tjananya warmaḻa winki.

¹⁶Paluṟu katiṟinangi aṉangu tjuṯa ilytjiwanungku. Munu paluṟu pungangi mayatja puḻka tjuṯa. Paluṟu iluntanu aṉangu Amurkunu tjuṯaku mayatja ini Tjiyannga. Munu piṟuku pungu aṉangu Patjanta nyinapai tjuṯaku mayatja ini Akanya. Munu tjanampa manta tjananya ungu palumpa walytja tjuṯa Israelkunu tjuṯa.

²³Kutjupa-aṟa warmaḻangku nganaṉanya pauntjingaṟa pungangi, kala puḻkaṟa tjituṟu-tjituṟuringi. Palu paluṟu nintingku nganaṉanya nyangangi watarkurinytja wiyangku, munulanya walatjunu mirpaṉtju tjuṯanguṟu.

²⁵Paluṟu kutjungku aṉangu tjuṯa, kuka mantatja uṟutja tjuṯa kuḻu uwankara paḻtjalpai.

²⁶Waḻkunmala pukuḻarira Mayatja Godanya ilkaṟingka nyinapainya.