Mitiyegec 51:2-19

²Ni ngicngac ogofocna faka mangana ayemmeai. Ge dzuacnuna kongaha ambesare. Ge kopocsicna medzuacna kongac kpebesare.

³Ni singyoac kpeai, imoc negengkecduae nga kopocsicna imoc nasosoc hensiduae.

⁴Gearusac kopocsic meficgema kicgau faka mangana yombong anai. Ifi anu geng yoac denec imoc fora fingectegerude ge ngic hania isinggema yoacngina desinec, imoc dindingac.

⁵Foracngoc, nengganango kopocsicgoc kecma ni kpenannuma menuu kopocsicnagoc fingerai.

⁶Nga herenau yoac forasac febeso, ge imocac negenna ngereeude. Ge imocac here sufu sufunau negen negentegec kpounenna.

⁷Ge babacmeac mema dzuacnuna kongac kpeba dzuacnuna hoeng kongaha feracyunuma kongac ambesare.

⁸Ge negemmana ni sogac sogai nga ubangerec negembesare. Geng sicna kpedzamenec nga ge negemmana yeni monggoc sogaibisia.

⁹Ge kopocsicna imohacnac kicga mesufubesena amma ni ngic ogofocna memanganeyunudarai, imoc dzuacdacna kpac ambeso.

¹⁰O Anutu, ge herena kongaha gboria meficgenemma asu gboria nga dindingac meficgema herena manau fainenna.

¹¹Geac hoannunac mi ukununa amma kpetiac Asuga nearunac mi meickena.

¹²Ge ebicfunac mesinunecac sogac sogai monggoc mengere nemma enactofoc tofoho nga ogomeficac asu nemma nanggenuna.

¹³Ge ifi anna ni singyoackpekpengic geac sing kpouyemmeba kopocsicgoc yeneng ubangina dzigeneu gearu monggoc hagecde.

¹⁴O Anutu, memengerecnaac Anutu, ni ngic kopocsiha kpacfu eng kpehomebaiac imohacnac mesinuna. Ge ifi anna ni nedzarannango imocac sogac sogai yegec kunengngoc heigemma geng ebicfunac mesinunec, imoc edeyunubade.

¹⁵O Kebu, ni enacnango dengeregubadeac enacbibicna mesina.

¹⁶Ni sesegerec megemba ge imocac songo mi negennade nga sese dema hosuc ohogemba ge imocac negenna ifingoc mi ngereebac.

¹⁷O Anutu, ni ine asuna ebicngo kipac kipactanggea gemba imocngo sesena anude. O Anutu, ubamangangngo ngichereu ebic meficgema kipatanggeu ge imoc hemma naric mi wanade.

¹⁸Ge Sionggac songo negemma gombunga ammima Yerusarenggac hocodatoa monggoc heimengere anna.

¹⁹Ge ifi anna sese gombunga nga dindingac megenni imocac negenna ngereeu sese ohogemma seseyang hafoangoc ohogennide. Neni sese dema burumaka ngiwa aratagau faiyunuma ohogennide.