Ola Saam 98:1-9

¹Sing nyuwan song langa YAWEI det trubala God. Imbin dum ola brabli gudwan ting. Garram im ron haibala pawa en strongwan bingga imbin win.

²YAWEI bin shoum im pipul olabat imbin bidim im enami olabat. Imbin shoum ola pipul langa ola kantri im pawa blanga seibum pipul, en blanga panishim im enami olabat.

³Imbin kipum im pramis langa ola Isreil pipul. Imbin rispek en abum det filing blanga laigim im pipul olabat olataim. Pipul brom ebriweya bin luk God bin win garram im pawa.

⁴Sing hepiwei ola pipul, langa YAWEI. Preisim im garram ola song en jingat gudbinjiwei.

⁵Sing preis song langa YAWEI. Plei myusik garram ola gita.

⁶Blowim ola longwan wisul en hon en jingat gudbinjiwei langa YAWEI det bos blanga wi.

⁷Solwoda, en ola enimul weya jidan insaid langa solwoda jingat gudbinjiwei. Kantri en ebrijing weya jidan langa kantri, sing du.

⁸Ola riba klep bingga, en ola hil sing mijamet blanga preisim YAWEI.

⁹Ebrijing preisim YAWEI det trubala God, dumaji im kaman blanga jadjim ola pipul langa dijan wel. Im garra jadjim pipul raitwei en gibitbat ebribodi feyago.