1Wur bo iru Yawe ilu tualko, mu awuk, nu ikia bibiya duap duap beteram se aratam; noko kuting sengam mu laili, kota ko kuting te ko kariimet nunga giam.
2Yawe kiwem te ko kariimet nunga giam mu wetang awuram; ale ko kiwem ningo diram la mu sor suen la nunga kausam.
3Nu ko den Israel kariimet nunga maonam, nu gomang nungaruk ale nunga sinar taukko mam, mu ko kuamin ares mam ale yawarakala nunga saongam ale nunga giam; se umutang te sor suen la ko kariimet noko saonga yawara beteram mu wetang te ari gilingiman.
4Ali lilim ko kariimet suen la, nina Yawe ko amilmilaral ale ko wur iluwalko; wur te se amilmil ko ngata nirung te nup patawuralko.
5Bawe moral ale wur iluwalko; gita se yukelele te yagowom ningo nungal ale ko nup patawuralko.
6Trumpet se kua sokelel itugumal ale, sail te airal ale Yawe ko amilmilaralko. Nu anananga King.
7Buta se gagi, ni nirung bitarko, se nina melmasak suen la ningi mu wur iluwalko; ale ali lilim la se, melmasak suen la awote mu karogo tala ngata beteralko!
8Nina yu luan bibiya, nigiting moralko; nina duruk suen la, bolala la amilmil wur iluwalko!
9Suen la Yawe koma te wur iluwalko, mu awuk, nu taiso mu ali lilim tuterukko. Nu ali ko kariimet lilim la kiwem ningo diram se munan yawarakala mu te nunga tuterukko.
Psalms 98
Psalms 98:1-9