Numero 11:23-34

²³Ãcõrẽba Moisea jarasia: –¿Mʌ̃a jũma poya oẽ́ca? Id̶i bʌa unuya mʌ̃a jarad̶ara poya oida wa poya oẽ́da.–

²⁴Ãcõrẽ ume bed̶ea b̶ad̶ara Moiseba israelerãa jarad̶e wãsia. Maʌ̃ne israelerã bororãda setenta edaped̶a Ãcõrẽ wua de caita pe edesia.

²⁵Mama Ãcõrẽra jʌ̃rãrãne ed̶aa zeped̶a Moise ume bed̶easia. Idjia Moisea diad̶a Jaureda maʌ̃ setenta israelerã bororãa bid̶a diasia. Maʌ̃ Jaurera ãdjirãmaa zeped̶a cawaẽ́ne Ãcõrẽneba bed̶ea duanesid̶aa. Mãwãnacarea waa ara maʌ̃ quĩrãca bed̶ead̶aẽ́ basía.

²⁶Maʌ̃ne Moiseba setenta bororã edad̶ad̶ebemada umé Ãcõrẽ wua demaa wãnaẽ́ basía, ãtebʌrʌ israelerã duanʌma panesid̶aa. Ab̶ara Eldá basía. Dewarabemara Medá basía. Ãcõrẽ wua demaa wãnaẽ́ bad̶amĩna Ãcõrẽba diad̶a Jaurera ãdjia bid̶a edasid̶aa. Maʌ̃ bẽrã ãdji sid̶a cawaẽ́ne Ãcõrẽneba bed̶ea panesid̶aa israelerã duanʌma.

²⁷Maʌ̃ carea cũdra ab̶a Moisemaa pira wãped̶a nãwã jarasia: –¡Eldáda, Medá sid̶a Ãcõrẽneba bed̶ea panʌa israelerã duanʌma!–

²⁸Maʌ̃ne Nuʌ̃ warra Josueba jarasia: –Mʌ̃ boro Moise, ãdjía idu mãwã bed̶eabirãdua.– (Josuera cũdra ed̶aʌba Moise carebabari basía.)

²⁹Moiseba jarasia: –¿Bʌa crĩcha b̶ʌca ab̶abe mʌ̃abʌrʌ Ãcõrẽ Jaurera erob̶aida b̶ʌda? Mʌ̃maarã bia b̶acasia Ãcõrẽba idji Jaureda jũmarãa diabʌrʌbara idjab̶a jũmarãda idjid̶eba bed̶eabʌdabara.–

³⁰Mãwãnacarea Moisera, israelerã bororã sid̶a jẽda wãsid̶aa israelerã duanʌmaa.

³¹Maʌ̃be Ãcõrẽba nãũrãda pusaareba tʌbisia. Maʌ̃ nãũrãba põrãda zocãrã enesia israelerã duanʌmaa. Israelerã duanʌmaʌba ewari ab̶a wãida b̶ʌ quĩrãca maʌ̃ põrãra jewed̶a jãrẽb̶aribusi b̶asia. Egorod̶eba dji ʌ̃tʌara dadji b̶acara daucha b̶asia.

³²Maʌ̃ ewarid̶e ãsa, diamasi, nurẽma bid̶a israelerãba põrãra quenabadjid̶aa. Dji maãrĩara bead̶aba ẽda cincuenta birasia. Maʌ̃gʌra besead̶e pae duanasid̶aa ãdjirã duanʌma.

³³Maʌ̃ põrã djara jũma cod̶i naẽna Ãcõrẽra ãdjirã ume quĩrũsia. Maʌ̃ bẽrã israelerãra zocãrã quinibisia.

³⁴Dji zocai panenaba maná awara co quĩrĩã pananara joucuasid̶aa. Maʌ̃ carea maʌ̃ ẽjũãra trʌ̃ b̶ʌsid̶aa Kibro-hataava.