NARONAA 11:23-34

²³Dikiri wèa à pì: Ma gbãna ni kánloo? Ĩni e tera, tó yã kũ ma ònnɛ ni kɛ ke ani kɛro.

²⁴Musa bò à Dikiri yã pìnↄ òńnɛ. À Isaraila gbɛ̃ zↄ̃kↄ̃nↄ kàkara gbɛ̃nↄn baaakↄ̃ akuri à ń zɛ́ ò lìka kuta pìii.

²⁵Akũ Dikiri kìpa tɛ́luku gũn à yã ò kãao. À a Nini kũ à kúa kpado gò à dì gbɛ̃ zↄ̃kↄ̃ gbɛ̃nↄn baaakↄ̃ akurii pìnↄnɛ. Kũ à a Nini pìi dìńnɛ lɛ, ò annabikɛyã ò, abire gbɛra odi ɛra ò kɛ̀ doro.

²⁶Gbɛ̃ kũ Musa ń sɛ́ gbɛ̃nↄn planↄ gↄ̃̀ bùran, gbɛ̃ do tↄ́n Ɛlɛdada, gbɛ̃ do sↄ̃ Mɛdada. Odi gɛ́ kuta kĩnaaro, ama Nini pìi sùḿma se, akũ ò annabikɛyã ò bùran.

²⁷Kɛfɛnna ke bàa lɛ̀ à gɛ̀ɛ à pì Musanɛ: Ɛlɛdada kũ Mɛdadao tɛn annabikɛyã o bùran.

²⁸Nuni nɛ́ Yↄsuamɛ Musa kpàasi ũ zaa a kɛfɛnnakɛgↄrↄa, akũ à pì: Baa Musa, ǹ gíńnɛ.

²⁹Akũ Musa pìnɛ: Ntɛn nɛ̀sɛgↄ̃ba kɛ kũńwo ma yã musun yá? Tó Dikiri a Nini dì a gbɛ̃nↄnɛ ò gↄ̃̀ annabinↄ ũ ń pínki, à manaroo?

³⁰Akũ Musa ɛ̀ra bùran kũ Isarailanↄ gbɛ̃ zↄ̃kↄ̃ↄ pìnↄo.

³¹Dikiri tò ĩa bò ísira kpa à sù kũ kpɛkpɛrɛwinↄ, ò dà bùrala. Ò lìka bùraai gu sĩnda pínki à kà tágↄrↄ do ũ, akũsↄ̃ ń vurana lei kà gã̀sãkuru pla.

³²Fãnantɛ̃ birea kũ gwãanio kũ a gu làa dↄnaao ò fùtɛ ò gɛ̀ɛ ò kpɛkpɛrɛwinↄ kũ̀kũ. Gbɛ̃ kũ adi kũkũ dasiro kũ̀kũ bùruma baro. Akũ ò fã̀tɛ à kori kɛ̀.

³³Kũ ò a nↄ̀bↄↄ dà ń lɛ́n gↄ̃̀nↄ, odi le ò só dasiro, akũ Dikiri pↄ fɛ̃̀ńyĩ à gagagyã kàńgu.

³⁴Akũ ò tↄ́ kpà gu pìinɛ Lɛ́'idenↄ Mira, zaakũ gwen ò gbɛ̃ kũ nↄ̀bↄ lɛ́'i ń kũnↄ vĩ̀n.