NARONA 21:15-32

¹⁵kↄ̃n ń guzurɛ kɛ̀ tà ai Aranↄ Mↄabunↄ bùsu lɛ́zɛkiio.

¹⁶Bↄna gwe dↄ aↄ̃ gàa Lↄ̀gↄ, guu kɛ̀ Dii bèn Musanɛ: Ǹ gbɛ̃nↄ kakↄ̃a mà í kpáḿma.

¹⁷Gwen Isarailinↄ lɛ̀ kɛ̀kii sìn: Í bↄ lↄ̀gↄn, gbasa wà lɛ̀ sínɛ,

¹⁸lↄ̀gↄ kɛ̀ wa dↄn'aɛdeenↄↄ yↄ̃̀ kↄ̃n línↄ, lↄ̀gↄ kɛ̀ wɛ̃ɛnɛnↄↄ pà kↄ̃n ń gònↄ. Bↄna gbáan aↄ̃ gàa Matana.

¹⁹Matana gbɛra Naliɛli, Naliɛli gbɛra Bamↄ.

²⁰Bamↄ gbɛra guzurɛ kɛ̀ kú Mↄabunↄ bùsun, guu kɛ̀ Pisiga mìsↄ̃ntɛ̃ aɛ dↄ gbáaa.

²¹Isarailinↄ gbɛ̃nↄ zĩ̀ Amↄrinↄ kí Siↄ̃a aↄ̃ bè:

²²Ǹ wa gba zɛ́ wà bↄɛ kↄ̃n n bùsuo. Wé gɛ̃ buraanↄ ke geepi búnↄnlo, wé a lↄ̀gↄ'i miro. Wégↄ̃ tɛ́ kína zɛ́daa guumɛ ai wà gá gɛ̃tɛo n bùsula.

²³Siↄ̃ e ń gba zɛ́ aↄ̃ gɛ̃tɛ a bùsunlo. À a zĩ̀karinↄ kàkↄ̃a ń píngi, aↄ̃ bↄ̀ɛ wèe gaańzi gbáan. Kɛ̀ aↄ̃ kà Yaza, aↄ̃ zĩ̀ kà kↄ̃n Isarailinↄ,

²⁴ben Isarailinↄ ń dɛ́dɛ kↄ̃n fɛ̃ɛdaao aↄ̃ ń bùsu sìḿma zaa Anↄ ai Yabokuzi Amↄninↄ bùsun, zaakɛ Amↄninↄ bùsu lɛ́zɛkii pì pãsĩ, è sí gɛ̃nlo.

²⁵Isarailinↄ Amↄri wɛ́tɛnↄ sì píngi kↄ̃n Ɛsɛbↄ̃o kↄ̃n a lakutunↄ píngi, ben aↄ̃ vɛ̃̀ɛn.

²⁶Ɛsɛbↄ̃n Amↄrinↄ kí Siↄ̃ wɛ́tɛdaa ũ. Siↄ̃ zĩ̀ kà yã kↄ̃n Mↄabunↄ kína káakuo, ben à à bùsu sìa ai Anↄ swaazi.

²⁷Beee yãnzin kɛrɛɛnↄ è be: À mↄ́ Ɛsɛbↄ̃, wà Siↄ̃ wɛ́tɛdaa pì kɛkɛ wà káɛ!

²⁸Tɛ́ bↄ̀ Ɛsɛbↄ̃ yã, zĩ̀karinↄ bↄ̀ Siↄ̃ wɛ́tɛ pì guu, aↄ̃ Mↄabunↄ bùsu wɛ́tɛda Ara kàatɛ Anↄ mì sĩ̀sĩ gbɛ̃ pìnↄ.

²⁹Wãiyoo Mↄabunↄ! Kɛmↄsi gbã̀gbãrinↄ, a kaatɛmɛ! Kɛmↄsi tò a gↄ̃gbɛ̃nↄ fã̀akↄ̃a, à a nↄgbɛ̃nↄ kpà Amↄrinↄ kí Siↄ̃a zĩ̀zↄnↄ ũ.

³⁰Ben wa ń fú, wa ń dɛ́dɛ zaa Ɛsɛbↄ̃ ai Dibↄ̃. Wa ń káatɛ ai Nↄfa kↄ̃n Mɛdɛbao.

³¹Lɛn Isarailinↄ vɛ̃̀ɛ Amↄrinↄ bùsun lɛ.

³²Musa gbɛ̃nↄ zĩ̀ Yaza asii gwa, ben Isarailinↄ gwee sì kↄ̃n à lakutunↄ píngi, aↄ̃ pɛ̀ Amↄri kɛ̀ aↄ̃ↄ kú gweenↄa.