Mumutara Ŋic 16:12-31

¹²Eme Delila e repa ɋâricne rorâ izi meticne qarâ muwec: “Simsoŋ, Filisa ŋic jaŋe rocguzo wareŋgopieŋ.” Ŋic jaŋe ficmaŋne mocko soŋkerâ fombiŋ. Ehame Simsoŋ e repa i bameŋ qâruru tinac bâtâcnewec.

¹³E iŋuc eme Delilazi âzâcnerâ muwec: “Ʒoraŋ â eeatuc sasawa enare warekutec miŋecgac ʒoaŋ ʒi fisikac. Go weniŋucko ro niŋgiŋ egarezo i mufua‐narec.” Iŋuc âzâcneme Simsoŋzi bâtikiecnehuc muwec: “Go qizec susuc‐nane qizecne 7 i repahec qâfiserâ kikindeŋko basanaŋketec ŋic gâcne jaŋere sâc jaha epemu.”

¹⁴Iŋuc âzâcneme Delilazi ŋowe‐ticnere qizec qickeme guŋ fowec, fohame qizec susuc‐ticne qizecne 7 i repahec qâfiserâ kikindeŋko râehuc Simsoŋ âzâcnerâ muwec: “Simsoŋ, Filisa ŋic jaŋe rocguzo wareŋgopieŋ.” Iŋuc mume Simsoŋzi guŋkonec mana ɋâɋârehuc fu herâ fahareme qizec‐ticne kikindeŋhec qâunuckewec.

¹⁵Iŋuc eme ŋonâŋ‐ticnezi âzâcnerâ muwec: “Go maŋgezi norao mi fohame, ‘Maŋzi ʒâficgukopac,’ iŋuc mutec sâckeocmu me? Go arec jahec â moc ʒoraŋ enarehuc tâpiri sâkoge wena fokac i moc mi nazameŋ.”

¹⁶Ŋonâŋ‐ticnezi ʒoaŋne ʒoaŋne ʒoɋac boc ecnekume maŋne betaŋke‐jâmbâŋ‐kewec.

¹⁷Eme maŋticnere fuŋne mufuacne‐fârerâ ʒiŋuc âzâcnewec: “Qizec‐nane moc mi bâtâcnekicne. No neŋgoc‐nanere bumaŋkonecteaŋ Anuture biŋe qacnukicne. Irec qizec‐nane roniŋmuo ine tâpiri‐nane omaeme betaŋkerâ ŋic gâcne jaŋere sâc jaha epemu.”

¹⁸Eme Delila e ŋowe‐ticnezi maŋticnere fuŋne mufuacne‐fârewec iŋuc honerâ dâŋ ʒiŋuc râehuc Filisa ŋic fekicne hefârec‐jopawec: “Ŋoŋe miŋecgac biac wareniŋ, e maŋticnere fuŋne naza‐fârekac.” Iŋuc mume Filisa ŋic fekicne jaŋe moneŋ rorâ ŋokactao fisimbiŋ.

¹⁹Eme e Simsoŋ qickeme guŋ foha ŋic moc hefârerâ ecneme qizec susuc‐ticne qizecne 7 i bâtâcnecne‐fârewec. Eme dameŋ ira fuŋkerâ tâpiri‐ticne jâoc rome betaŋkewec.

²⁰E iŋuc ecnerâ wiwickehuc muwec: “Simsoŋ, Filisa ŋic rocguniŋte wareŋgopieŋ.” Iŋuc mume Simsoŋ e guŋkonec ɋârerâ ʒiŋuc manasuwec: “No dameŋ gâcnao eekopac sâc iŋuc ehuc hetâtiec‐jopapemu.” E dameŋ ira Wofuŋzi behewec i moc mi mana tarawec.

²¹Eme Filisa ŋic jaŋe basanaŋkerâ ʒâŋe hândâŋ jahecne riporâ Gaza haeo bahumbiŋ. Bahurâ kâpâcwâru jajahec aeŋ bâbâroŋzi bakicne izi basanaŋkembiŋ. Iŋuc ecnepie Simsoŋ e kâpâcwâru fickoa jacgoŋ hândâŋne banʒaŋnehuc juwec.

²²E ira juhame qizec susuc‐ticne bâtâcnembiŋ i mocwâc wefurâ ʒorawec.

²³Eme Filisa ŋic fekicne jaŋe ʒeri ehuc nemu‐jeŋic Dagoŋ e taha bâzi rikecneniŋte tumaŋnembiŋ. Jaŋe ʒiŋuc hâcne mumbiŋ: “Nemu‐nâŋec e râsi‐nâŋec Simsoŋ nâŋâcne meo râewec.”

²⁴Eme ŋic ŋokac jaŋe Simsoŋ honerâ nemu‐jeŋic mu ʒeri ecnehuc ʒiŋuc hâcne mumbiŋ: “Râsi‐nâŋec Simsoŋ e mâreŋ‐nâŋec sipirickehuc ŋic bocjaha nâpowecte nemu‐nâŋeczi menâŋecko râewec.”

²⁵Iŋuc muhuc maŋjeŋic fie ruruckehame ʒiŋuc mumbiŋ: “Simsoŋ hefârepie warerâ mamasiri wiac eme honenʒepeneŋ.” Iŋuc murâ Simsoŋ kâpâcwaru fickonec hefârepie mai‐jeŋicko domahuc mamasiri ewec. Eme jaŋe wâtuŋ neŋgocne jajahec jahere ŋoŋondeŋko ecnepie domawec.

²⁶Eme Simsoŋzi motec meticnao bame domawec e âzâcnerâ muwec: “Wâtuŋ neŋgocne fic ʒi derâ domakopirec i bâuarâ manahuc sâcne roweckezapo?”

²⁷Fic i ŋic ŋokac jaŋe fuse sâqorembiŋ. Filisa ŋic fekicne sasawa jaŋe wâc ijaha ŋembiŋ. Erâ fic bupuo ŋic ŋokac 3 tauseŋ jaŋe Simsoŋzi mamasiri ehame honehuc ŋembiŋ.

²⁸Ehame Simsoŋzi Wofuŋ wâsickehuc muwec: “O Wofuŋ Anutu, go manasu‐narehuc basanaŋnucmurâ numu‐garekopac. O Anutu, arec mocjaha ʒi sawa baficnutec ʒâŋe hândâŋ jahec‐nanere Filisa ŋic okacne bazu‐jarepemurâ numu‐garekopac.”

²⁹Simsoŋ e iŋuc murâ wâtuŋ neŋgocne jajahec ʒâʒâŋiŋko fic derâ domapic i mefârezi moc â qanazi moc iŋuc ro basanaŋ‐jofawec.

³⁰Iŋuc erâ muwec: “Filisa ŋic jaŋehec hâmozepac.” Simsoŋzi iŋuc murâ tâpirihec fârehuc dapeha ficzi ʒaŋkerâ waha ŋic fekicne â omane ŋembiŋ jaŋere faio hewec. Eme hâmohuc jopame qâŋɋâŋ fuawec izi ɋâricne juhuc jopawec i jâurukac.

³¹Ehame hahac ɋafâcne â garikiŋfâc‐ticne jaŋe hurâ qâŋɋâŋ‐ticne rorâ bafe Zora â Esitaoli hae ŋondeŋ‐jekicko mamac‐ticne Manoare ʒâŋeruŋ gufukicne ira duckembiŋ. Simsoŋ e Israe ŋic jaŋerao mumutara gie bahuc juha jara 20 tarawec.