Judges 16:12-31

¹²Me fek Delilah boch e gaf ni kab be’ech me m’ag ngak. Me tolul ni ga’ar, “Samson! Keb piyu Filistia!” Ma ke par boch e pumo’on ni yad be son u lan reb e senggil. Ma fa’ani gelnag ir me math’math’ fapi gaf u pa’ ni gowa tret.

¹³Me ga’ar Delilah ngak Samson, “Ka ga be aliliy nigeg ma ga be ban nigeg. Mog ngog rogon e n’en nra rin’ me m’agem be’.” Me ga’ar ngak, “Fa’an ga ra l’ang piyan lolugeg ni medlip yael’ ma ga tay ba richib ngay ngam chichi’iy, mu gu par ni kug me’waer ni bod e yug girdi’.”

¹⁴Me guy rogon nge mol me fek fa medlip yil’ i piyan lolugen nge lifith nga ban’en ni yima lifith e mad ngay. Me fek ba richib nge ning ngay ni nge dabki puf, me tolul ni ga’ar, “Samson! Ke yib e piyu Filistia!” Machane me od me puf piyan lolugen ko fare n’en ni yima lifith e mad ngay.

¹⁵Me ga’ar Delilah ngak, “Uw rogon ni ga be yog ni gab adageg, ma gathi er rogon u wun’um? Nga dalip yay ni kam aliliy nigeg, ma kadawor mu weliy ngog ko mangfan ni er fanam gel.”

¹⁶Me par ngi i me’eryag ngak ni gubin e rran. Me chelban nge ngochan’ Samson ngak ni yigu be me’eryag ngak.

¹⁷Me munmun mri weliy e tin riyul’ ngak ni ga’ar, “Dawor nth’ab piyan lolugeg bi’id. Nap’an nni gargel nigeg mi ni pi’eg nga pa’ Got ni nggu mang ba Nazirite. Fa’an yira th’ab piyan lolugeg, ma ra m’ay gelngig nggu par ni kug me’waer ni bod e yug girdi’.”

¹⁸Fa’ani nang Delilah nike weliy e tin riyul’ ngak, me l’oeg e thin nge yan ngak fapi pilung ko Filistia ni ga’ar, “Ka ta’ab yay ni ngambad, ya ke weliy e tin riyul’ ngog.” Miyad yib ni kar feked e salpiy.

¹⁹Me gurgon Delilah nge mol Samson nga daken ay ngri mol, me pining be’ nib mo’on nge yib i th’ab fa medlip wu’ i piyan lolugen Samson. Me tabab fare pin i gafgownag, ya ke chuw gelngin Samson.

²⁰Me tolul Delilah ni ga’ar, “Samson! Ke yib e piyu Filistia!” Me od me ga’ar u wan’, “Bay kug gel nigeg mu gu thay ni bod gubin yay.” Ma de nang nike chuw SOMOL rok.

²¹Me yib piyu Filistia ra lufed lan mit nruw raba’. Miyad fek nga Gaza ngar m’aged e chen ngak nni ngongliy ko wasey ni bronze, miyad tay ngi i maruwel ngi i bilig e wheat u kalbus.

²²Machane mi i n’uw piyan lolugen i yan.

²³Me mu’ulung piyu Filistia ni ngar madnomgad miyad pi’ ba maligach ni ba ga’ ko fare got rorad ni Dagon. Miyad tang ni be lungurad, “Fare got rodad e ke gagiyegnag kadgelgad ngak e to’ogor rodad i Samson!”

²⁴Ma fa’ani guy e girdi’ Samson, miyad tang ni yad be pining e sorok ngak fare got rorad ni be lungurad, “Got rodad e ke pi’ e to’ogor rodad ngalan pa’dad, ir e cha’ ni i gathay e nam rodad, ke thang e fan rok bo’or i gadad!”

²⁵Yad be garus u fithik’ e felfelan’ me lungurad, “Ngan pining Samson nge yib, ya ngi i palag owchadad!” Ma fa’anra feked Samson nga wuru’ e kalbus mu’ur moninggad ngak, minib ni sak’iynag nga thilin e duga’ ko fare naun.

²⁶Me ga’ar Samson ngak fare pagel ni ir e ke kol pa’ Samson be pow’iy i yan, “Mu fekeg i yan ko fa gal duga’ ni ir e gelngin e re naun ney, ya gu ba’adag ni nggu gif ngay.”

²⁷Ma re naun nem e ke sug ko pumo’on nge ppin. Ma fa lal i pilung nu Filistia e yad bay u rom ni yad urngin, ma gonap’an dalip e biyu’ e pumo’on nge ppin ni yad bay u daken e chigiy, ni yad be yaliy Samson ma yad be moningnag.

²⁸Me meybil Samson ni ga’ar, “SOMOL ni Th’abi Tolang, wenig ngom, mu leam nigeg; wenig ngom i gur Got, mu pi’ gelngig e t’ayaney, nggu maruwel ngay e ta’yaney nggu fulweg ngak piyu Filistia labgen lan owcheg nruw raba’.”

²⁹Me kol Samson fa gal duga’ ni bay u lukngun e naun ni gelngin fare naun, ra barba’ i pa’ me tay nga reb fa gal duga’, nge pi’

³⁰me tolul ni ga’ar, “Nggu’un ngak piyu Filistia ko yam’!” Me pi’ fa gal duga’ ni kari musmus gelngin, me puth fare naun nga daken fa lal i pilung nge urngin e girdi’. Ka bo’or e girdi’ ni li’ e ngiyal’nem nge yim’ ko tin ni li’ ni kabfos.

³¹Me yib pi walagen ni pumo’on nge girdi’en e tabinaw rok nga p’ening ngar feked mranod ra chibgiliyed nga thilin yu Zorah nge yu Eshtaol, ngalan e re low ni ba’aram nni yan ni chibgiliy Manoah ni chitamngin ngay. Ma aram e ke gaman rliw’ e duw ni i par ni be gafaliy piyu Israel.