Soukapwüng 16:12-31

¹²Iei mine Telila a angei säl mi fö, a föti Samson o kökkö, “Samson, ekewe re Filistia repwe le turufuk.” Iwe, ekewe mwän ra op o witiwit lon ewe rum lukalapen ewe imw. Nge Samson a mwüti ekewe säl seni pöün usun terech.

¹³Mürin, Telila a üreni Samson, “Tori ikenai ka chök turunufaseei o chofana ngeniei. Kopwe pwäri ngeniei met eman a tongeni föti ngonuk.” Nge Samson a üreni, “Are kopwe türünalong füchoch meten mökürei lon eu tür o annüküretiu ren ewe chüfölün tür, mürin üpwe apwangapwang usun chök aramas meinisin.”

¹⁴Iwe, lupwen Samson a annut, Telila a angei füchoch meten möküran o türünirelong lon ewe tür. A pwal annüküretiu ren efoch chüföl o kökkö, “Samson, ekewe re Filistia repwe le turufuk.” Iwe, Samson a nennela le annut, a üttawu ewe chüföl, ewe ipo me ewe tür.

¹⁵Mürin, Telila a üreni Samson, “Ifa usun om kopwe tongeni apasa pwe ka tongeei, nge lelukom a toau seniei. En ka turunufaseei fän ülüngat, nge kosap pwäri ngeniei popun om pöchökül.”

¹⁶Iwe, lupwen neminewe a arianikisi Samson rän me rän o echimwa, a mos ren pwe a mochen mäla.

¹⁷Mürin, Samson a pwäri ngeni Telila unusen monomonen lelukan o üreni, “Esap mwo fich mökürei fän eu, pun ngang eman Nasir, eu sokun aramas mi imwüla fän iten Kot seni ai uputiu. Are epwe fich mökürei, mürin ai pöchökül epwe sü seniei, nge üpwe apwangapwang usun chök aramas meinisin.”

¹⁸Iwe, lupwen Telila a mefi pwe Samson a pwäri ngeni unusen monomonen lelukan, a titi ekewe samolun chon Filistia o üreniir, “Oupwe feito iei chök, pun a pwäri ngeniei unusen monomonen lelukan.” Mürin, ekewe samolun chon Filistia ra feito ren neminewe o uweato ewe moni.

¹⁹Iwe, Telila a aünätä Samson won afön o föri met epwe anutela ren. Iwe a köri eman mwän, pwe a fichiela ekewe füchoch meten möküren Samson. Mürin a popuetä le ariaföüü Samson, nge an pöchökül a sü seni.

²⁰Mürin, Telila a kökkö, “Samson, ekewe re Filistia repwe le turufuk.” Iwe, Samson a nennela le annut o ekieki, “Üpwe apichiei o feila usun mesemwan.” Nge Samson esap silei pwe ewe Samol mi lapalap a likitala.

²¹Iwe, ekewe chon Filistia ra turufi Samson o alusawu föün mesan. Mürin, ra emwenätiu ngeni Kasa o föti ngeni selipiras. Iwe, Samson a wisen föira föün wiich lon ewe lenien föir me lon imwen fötek.

²²Nge meten möküren Samson ra pwal pwüksefäl mürin an fich.

²³Iwe, ekewe samolun chon Filistia ra mwichfengen, pwe repwe eäni eu asor mi watte ngeni Takon ar we kot o föri eu mwichen apwapwa. Pun ra apasa, “Ach kot a atolonga lepöüch Samson ewe chon oputakich.”

²⁴Nge lupwen ekewe aramas ra küna Samson, ra mwareiti ar kot o üra, “Ach kot a atolonga lepöüch ewe chon oputakich, ätewe mi ataela fanüach o niela chomong leich.”

²⁵Lupwen leluker a fokun mwänek, ra apasa, “Oupwe körato Samson pwe epwe sipai ngenikich.” Iei mine ra kökkörawu Samson me lon imwen fötek, nge i a sipai ngeniir. Mürin, ra aütai lefilen ekewe üren ewe imw.

²⁶Iwe, Samson a üreni ewe ät mi amwöchü pöün, “Kopwe mwüt ngeniei pwe üpwe atapa ekewe ür ewe imw a ü won, pun üpwe ünnü ngeniir.”

²⁷Nge ewe imw a ur ren mwän me fefin, pwal ekewe samolun chon Filistia meinisin ra nom lon. Nge won ewe imw me asan mi wor ina epwe ükükün ülüngeröü mwän me fefin mi katol Samson, lupwen a sipai ngeniir.

²⁸Mürin, Samson a iotek ngeni ewe Samol mi Lapalap, “Ai Samol me ai Kot, üa tüngor ngonuk kopwe chechemeniei. Ai Kot, kose mochen kopwe apöchökülaei pwal fän eu chök o mwüt ngeniei, pwe üpwe ngeni ekei chon Filistia chappen ar föför ngeniei fän iten mine ra föri ngeni mesei kei ruoföü.

²⁹Iwe, Samson a angaloi ekewe ruofoch üren lukalap ewe imw a ü won, o tinifeseniir, pöüifichin a tini efoch, nge pöüimöngün a tini pwal ewe efoch.

³⁰Iwe, Samson a üra, “Üpwe eti ekewe chon Filistia le mäla.” Mürin a tiniir fän unusen an pöchökül, pwe ewe imw a turutiu won ekewe samol me ekewe aramas meinisin mi nom lon. Iwe, chokewe Samson a nirela lupwen an mäla ra chomong seni chokewe a nirela lupwen a manau.

³¹Mürin, pwin kewe me unusen an famili ra feitiu o angei somän, ra uweela o peiaseni lefilen Sora me Estaol lon peiasen Manoa saman we. Iwe, Samson a soukapwüng lon Israel lon ükükün rüe ier.