Qiata Vaiintinavu 16:12-31

¹²Minti tuvaro Delailaava qaraaka naaqunta vonavu varakero vira rumpatora. Vaiinti vonavu vo rumuqi kukeqavi vauvaro viva naveraitiharo, Samsonio, veve, Pirisia ani variavo, tuvaro viva tavuna naaqunta hatoka kaintema kero nora naaqunta hatoka kora.

¹³Delailaava Samsonirara tiharo, Are virera uva qaqiqai tihara tiriara una uva ti variaro. Mpo, nantiakeroe vovano ai rumpataanarove? Virara ti tiva timiraqe iriare, tuvaro viva tiharo, Are ti qiata kauhi vunta taunara 7navu varakera paraanke autua maasiniraqi vo naaqunta hampata taatautera, kairiqaqohaira ti kauhivata naaquntavata raqikikera rumpatairaro, ti kempuka kia vairaqe te qaqi vaiinti voqaarama vairarave, tiro.

¹⁴Minti tivakero vauvaro Delailaava tavovaro viva vaite vauvaro viva vira qiata kauhi vuntatora varakero paraanke naaqunta hampata vira taataukero, kairiqaqohairo vira kauhivata naaquntavata raqikitero, viraqaahairo naveraitiharo, Samsonio, veve, Pirisia ani variavo, tuvaro viva vaitonaihairo himpiro nai qiata kauhi maasiniqaahairo qaqini raraukora.

¹⁵Viva mintima kovaro Delailaava virara aqao tiro, Are kukeqa taana uvara kia tivata tiva timiaravara tira, are qumina tiriara tihara, Ti muntukavano ariara vaivo, tiaro. Are taaramo tataa kia nena kempuka okarara ti tiva timiraitira, qaqiqai virera uva tihara tiriara una uva ti variaro, tiro.

¹⁶Minti tivakero viva vo enta vo enta vi uvaraqai tivaqiro vi vauvaro vira voqamakero popohovaro

¹⁷viva ekaara vitini vira vutukero tiva amura. Viva tiharo, Ti vatatai entaraqaahai Kotira kaama amitaarara ti, vika kia ti qiata kauhi toqakaarave. Vika ti qiata kauhi muqukaivera, ti kempukavano taiqa viraqe te qaqi vaiinti voqaarama vairarave, tiro.

¹⁸Minti tuvaro Delailaava tavovaro viva quqaa uva tuvaro viva uva varakovaro Pirisia avuhainauka vaunaini vura. Viva tiharo, Nenavu qaiqaavata maini aniate. Viva ekaa vi uvara qoqaa ti tiva timivo, tumanta Pirisia avuhainauka silvaa monuvata vare anura.

¹⁹Delailaava Samsonirara ani ti auvoqi vaitaane tuvaro viva mini vaita aavata vuvaro viva vaiinti vo aarovaro viva ani Samsonira qiata kauhi 7navu vuntatora toqakora. Nahenti viva mintima kero vira qoraiqama kovaro vira kempukavano taiqa vura.

²⁰Mintuvaro nahenti viva naveraitiharo, Samsonio, veve, Pirisia ani variavo, tuvaro viva vaitonaihairo himpiro nai iriro tiharo, Kaiqe te tota unantemake tenta vaata qakiqakimake qaqi variare, tivakero viva kia iruvaro Noravano Kotiva vira qaqirakero kia vira hampata vaura.

²¹Ho Pirisia vika vira ravaaqavuke vira avutanta vauruke vira vita vare Gasa vatukaini otunte mini baraasi seniqohai vira rumpatovaro viva karapuhiqi vaiharo uitive baalive rukavu nimite vaura.

²²Viva karapuhiqi vauvaro vira qiata kauhivano qaiqaa qampiqe vaura.

²³Pirisia avuhainauka nái una variqa Dagonira nora ofaa iha quara amitareka ruvaaqumavi vaiha tiha, Tinavu variqavano tinavu navutaara Samsonira tinavu kauquqi kaivo, ti. Vinavuka minti tumanta

²⁴vaiinti nahenti vikavata Samsonira tave tiha, Tinavu variqavano tinavu navutaara vira tinavu kauquqi kaivo. Vi vaiintiva tinavu naaho maata qoraiqamakero tinavu navunaakavata airitahaa arukaivama vaivo, ti.

²⁵Vika minti tivake airi uaini namaqi viha naveraitiha, Samsonira aaraivaro viva uruntero tinavu quahama timitaarire, tumanta vokuka vira karapuhiqihai vita kovaro viva vika nivuqaa uru vaiharo ruhamaqiro vi vaura. Ho vika Samsonira naavu naaqura taaraqanta vaunaini himpima tovaro

²⁶Samsoniva vainti nankuavano vira kauqu toteharo vi ani vaurara tiharo, Are ti vita varera maa naavuraqi ori naaquratanta vainaini vuru kairaqe te vitanta auteha tavaare. Te vitantaqaa muntuvi vairerave, tura.

²⁷Ho vaiinti nahenti airitahaa vi naavuraqi vaura. Pirisia avuhainauka 5navuvata viraqi vaumanta naavu qiataqaa 3,000 vaiinti nahenti vaiha Samsoniva vika quahama nimitora tave vaura.

²⁸Mintuvaro Samsoniva Nora Kotira aarero tiharo, Mpo Noravauvo, are ekaa haikaqaa raqiki variaravama variaro. Ho vate ti iri timitaane. Qaqi voqavata ti kempukaiqama timitairaqe te Pirisia ti tivutanta vaurukaaraqaa vuntu kaare, tiro.

²⁹Minti tivakero Samsoniva nai kauqutanta ratuta kero naavu aqute vau naaquratanta utu varareva kauqu tanaraqohairo naaqura vo utu varero kaanaaqaqohairo vo utu varero

³⁰naveraitiro, Qaqi kairaqe te Pirisia hampata qutu vuare, tivakero viva ekaa nai kempukaqohairo naaquratanta venta aqukovaro naavuvano ekaa raputama vura. Naavuvano raputama viharo Pirisia avuhainaukave, vaiinti nahenti naavuqi vaukave, vikaqaa hiqintura. Vi entara Samsoniva qutiharo airi vaiinti nahenti arukova viva qaqi vau entara arukokavata naatara kora.

³¹Ho viraqaahairo vira qata vakaukavarave, vira qora naavuqi vaukave tuvunte, vira vaata vare tuvurante nai qora Manoaara quntama tonaini quntama tora. Sora vatuka hini vauvaro Estaoli vatuka hini vaumanta vika vira vaata tavaarana quntama tora.