Mika 3

1

2

3

4

5

6

7

¹Ma aê kasôm gebe Amac Jakobnêŋ laumata to Israelnêŋ gôliŋwaga, akêŋ taŋem.

²Amacnêm kôm, gebe ajala biŋgêdêŋ me masi. Amac taŋ akêŋ kisa gêdêŋ gêŋ ŋajam ma têmtac gêwiŋ sec, amac taŋ akwalec ŋoc launêŋ ŋaôlic su ma amoata nêŋ ŋamêsôm su aŋga ŋatêkwa,

³amac taŋ aeŋ ŋoc lau amboac aeŋ gwada ma akwalec nêŋ ŋaôlic su ma atuc nêŋ ŋatêkwa popoc-popocgeŋ naŋ, amac asa êsêac amboac asa gwada kêsêp ku, amboac bôc ŋamêsôm kêsêp suc.

⁴Êsêac oc têtaŋ êndêŋ Apômtau, mago eŋ oc êkêŋ taŋa êsêac atom. Êndêŋ bêc tonaŋ eŋ oc ênsaŋ laŋôanô auc êndêŋ êsêac, gebe sêŋgôm nêŋ gêŋ sec.

⁵Apômtau kêsôm biŋ tonec kêkanôŋ propete, taŋ sêwê aêŋoc lau seso naŋ, gebe Êsêac embe têtap gêŋ taniŋŋa sa, go sêmôêc gebe “Wama,” mago ŋac, taŋ kêkêŋ gêŋ taniŋŋa kêsêp êsêac aweŋsuŋ atom naŋ, oc sênac siŋ êndêŋ eŋ.

⁶Kêtu tonaŋŋa êmbêcauc êkôm amac auc, gebe alic ŋakatu êtiam atom, gêsuŋbôm êsa, gebe aoc biŋ lasê atom. Oc êsêp gebe êpô propete tonaŋ êtiam atom, ma êndêŋ ocsalô ŋakesec êkôm êsêac auc.

⁷Go lau-sêlic-ŋakatuwaga majeŋ ê ma lau-seoc-biŋ-lasêwaga nêŋ kauc oc êlênsôŋ. Êsêac oc sêmbôc aweŋsuŋ auc, gebe Anôtô gêjô êsêac aweŋ atom.

⁸Mago aê amboac teŋ. Ŋaclai to Apômtaunê ŋalau ma biŋgêdêŋ to ŋajaŋa gêjam aê auc, gebe jawa Jakobnê geo to Israelnêŋ sec sa.

⁹Amac gôlôac Jakob nêŋ laumata to gôlôac Israel nêŋ gôliŋwaga, akêŋ taŋem biŋ tonec. Amac adec biŋgêdêŋ to alênsôŋ lêŋ solop samob.

¹⁰Amac akwê Sion sa ŋa dec ma Jerusalem ŋa biŋ geo.

¹¹Êsêacnêŋ laumata sêmêtôc biŋ gêjô awa ŋalêsiŋa su. Nêŋ dabuŋwaga têdôŋ lau, taŋ sêjam ôli êsêac naŋgeŋ. Nêŋ propete seoc biŋ lasê gêdêŋ lau, taŋ sêkêŋ mone gêdêŋ êsêac naŋ. Mago êsêac taêŋ kêka Apômtau ma sêsôm gebe “Apômtau gêmoa aêac ŋalêlôm gêwiŋ atom me. Gêŋwapac teŋ êtôm gebe êtap aêac sa atom.”

¹²Mago êsêac oc sêkac Sion ôkwi amboac sêkac nom ôkwi aŋga kôm, ma Jerusalem popoc-popocgeŋ êtu lênduc, ma lôm dabuŋ ŋalôc ênam tau ôkwi êtu saleŋbôm êtu amacŋa.