Text copied!
CopyCompare
Buka Hope - Maika

Maika 3

Help us?
Click on verse(s) to share them!
1Meke zama si arau, “Va avoso, gamu na koimata te Zekopi, gamu na baṉara pa butubutu Izireli. Gamu si pada pude tumae nia sa ṉinoṉo.
2Ba kana hola ia gamu sa lineana meke tataru nia gamu sa kinaleana; hiko pani gamu sari na likakalae koari na Qua tinoni guana sapu teuru pani gamu sari kapudi, meke sari masa pa susuri dia;
3tavete guana sapu hena i gamu sari masadi ri Qua tinoni, sira pani gamu sari kapudi meke moku va umumu i gamu sari susuridi; kubokubolo i gamu guana masa pa raro.”
4Beto meke kote kabo vura la koe Zihova si gamu, ba lopu kote olaṉa gamu Sa. Pa totoso asa si kote tome ia Sa sa Isumatana koa gamu koa gua koasa kinaleana sapu tavetia gamu.
5Hiera gua si zama nia e Zihova: “Sapu la gua koari na poropita pu turaṉa va seu i sari Qua tinoni, be poni ginani keke tie, si kote zama vura la nia rini sa ‘binule’ koa sa; be lopu ta poni ginani rini, si kote leveni tinasuna rini.
6Gua ke na boṉi si kote kamo koa gamu, sapu loke Qua inavoso koa ia, meke na hinuporo sapu loke pinutagitana. Kote lodu goreni na rimata sari na poropita, meke sa rane si kote huporo mo koa rini.
7Sari matemateana si kote kurekure meke sari tie vakuvakutae si kote tome. Ari doduru arini si kote nobi rini sari isumatadia sina loke inolaṉa si vagi rini koa sa Tamasa.”
8Ba sapu arau hie, si siṉi au na ṉiniraṉira, koasa Maqomaqo te Zihova, meke turaṉae ṉinoṉo meke minataqara, pude zama vura nia koe Zekopi sa nana sineke tinarae, meke koe Izireli sa nana sinea.
9Avosia si hie, gamu na koimata pa butubutu te Zekopi, gamu na tie tuturaṉa pa butubutu te Izireli, pu hakohako nia sa ṉinoṉo meke va sea i sari doduru sapu toṉotodi;
10pu kuria sa popoa Zaione pa sineke va mate tie, meke sa Zerusalema pa tinavete kaleadi.
11Vilavilasa sari koimata luli gua pa tinabara golomo, sari nana hiama si va tumatumae luli gua pa tinabara, meke sari nana poropita si tozi dinogodogorae pa poata. Gua ba kalavarae si arini koe Zihova meke zama, “Vea, lopu koa turaṉa gita tu e Zihova si gita? Na loke tinasuna tugo si kote raza koa gita,” gua.
12Gua ke, koa gua koa gamu, sa popoa Zaione si kote ta geli guana inuma, Zerusalema si kote ta evaṉae na kobi remoremo, sa toqere sapu hake ia sa Zelepade si kote hiqohiqo tamunia.