Mboe 2:1-12

¹Parei ta zin karkari keten malmal mi kalŋan izalla? Wal matan munŋan timburmbuuru sorok paso?

²Zin king ki toono ziŋan zin peeze kan tiparlup zin, mi tikam kumbun be tikam malmal pa Yooba ziru king ta Yooba itunu iroogi mi iuri pa uraata na.

³Tizzo ta kembei: “Ai, kozo temet ma tombot ndel pa ziru peeze kizin: Kokena timboro iti mini.”

⁴Tamen Yooba imbotmbot se muriini peeze kana ta saamba a, mi irepilpiili zin mi izeŋzeeŋge pizin.

⁵Mi iŋasaara zin raama keteene malmal, mi leleene bayouŋana tana ikam zin ma timoto kan. Mi iso pizin ma iso:

⁶“King taiŋgi, nio ituŋ aŋuri be ikam ruŋguŋ, mi imbot sala abal tio potomŋana Sion mi ikam peeze.”

⁷Mi king kiti, ni iso ta kembei: “Nio ko aŋsoyaara sua ta Yooba iso pio na. Sua ta kembei: ‘Nio lutuŋ ta nu na. Koozi aŋwe tomom.

⁸Mi nu sombe wi yo, nako aŋkam toono ta boozomen ka tomtom bizin ma timap tiwe lem. Mi zin ko timbot la kopom mbarmaana, mi nu kam peeze pizin.

⁹Peeze ku ko mbolŋana kat. Tana ko punmeete mburan kembei ta tomtom ipetepaala kuuru ma imapalpaala.’”

¹⁰Tana niom king ta boozomen, kakam kat ŋgar. Mi niom peeze koyom tomini, kere be koto sua tio ti.

¹¹Kozo komoto Yooba, keleŋ la kalŋaana, mi kembeeze pini. Mi kokoto ituyom, mi kelek kumbuyom pa Lutuunu. Kere: Kokena kepei Anutu kete malmalŋana kini, to ipasaana yom karau men, mi kemetmeete ma kala leyom. Paso, ni mata mburmburŋana.

¹²Mi wal ta so tipase pini be iwe ur pizin mi imenderkaala zin na, zin ta boozomen ko lelen ambai kat, mi kampeŋana kini imbotmbot se kizin.