GWAY GI IDAWUU’D 2:1-12

¹Ata miina ’kwani gi kala tiya adulaṯṯ mo, dhali ’kwani gam ’twa/ ’kup̱ ki p̱e’th kan mo?

²Imaliḵ gi ’kwaniny’cesh doshkin ki is buni ki ’dishe/ mo, dhali itap̱a tuli isi monṯal ’de/ mo ap̱o/ Tap̱a dhali ap̱o/ a’din ’de/ jin ’koshkunu ki monyca mo, mmo/o gwo mo ki:

³Dhalki ana ’ce’da mondeḵ buni mo dhali ṯaka nyoḵ buni ’peni ana mo.

⁴A’di jin c̱a’bki’d eya ris momis mo tani p̱e’thki’d mo, Tap̱a miiki uni ka mudhiny’cere/ mo.

⁵Yan’ko’d a’di midi ṯor uni gwo eya nyor piti mo dhali dher uni is bwa ka nyor piti jin c̱ithirac̱ithir mo mmo/o gwo mo ki:

⁶Aha/ karkina maliḵ pem mo ap̱owa Sihyuun, a’di jin ta wosh pem jin ḵogu mo.

⁷Aha/ mina ṯor gwoŋḵan gi Tap̱a mo: A’di ta gwo jin ona a’di aha/ mo ki: /E ta Ya/m pem mo, shwane/ aha/ dho’thkina /e mo.

⁸Doṯi aha/ ma, dhali aha/ mina c̱i /eya ris kal gi ’kwaniny’cesh mo mmota mal pini mo, dhali ’pemen gi mony’cesh mo tani uni mini ta kum pini mo.

⁹/E mini ’ce’d uni bwa mo ki cwan kol ’kus jin ta toŋḵuthu’d mo, dhali mu/ uni ’twa/a ’cesh mo ka ’ci’cimi’th mo me’d toŋ’kul bwa jin uḵu ’pena je mo.

¹⁰Dhali wakan shwane/, ayy imaliḵ, yuḵi is mo ma, muri is mo, ayy um itap̱a gi mony’cesh mo.

¹¹Miiyi Tap̱a to ki moŋḵo/ is mo dhali ki mondee is mo,

¹²p̱iyi sho’k piti ’twa/ mo, isi ciki/ ki a’di midi diki shwaa nyor mo, dhali um minu ’ce’d sho’k ibway mo, haali/ anyor piti ’thakunu hila/ ki jahanne/ mo. Mom’bor mii goma ris uni gun bu’thki mo jin huru jwa e a’di mo.