Text copied!
CopyCompare
Anutu Sua Kini Potomaxana - Mboe

Mboe 41

Help us?
Click on verse(s) to share them!
1Mboe ki Dabit Tomtom ta so mataana iŋgalŋgal zin sorrokŋan na, kampeŋana ki Anutu ko imbotmbot se kini. Mi sombe pataŋana sa indeeŋi na, Yooba ko iuuli.
2Yooba ko mataana pini mi iporoukaali. Tana ni ko imbotmbot ambai su toono ta Yooba ikam pa wal kini na, mi kampeŋana ki Yooba imbotmbot se kini. Yooba ko irao izemi la ka koi bizin naman na som.
3Mi sombe mete ikami, na Yooba ko imborro i mi ipomboli, mi iwiti ma imaŋga mini pa mbalia kini.
4Nio aŋso ta kembei: “Yooba, nio aŋkam sanaana pu. Mi muŋai yo mi urpe yo ma niŋ ambai mini. Pa nio mbesooŋo ku tau.”
5Iŋgi koŋ koi bizin tikamam sua sananŋana pio. Tizzo ta kembei: “To tana, ŋiizi na imeete ma ila ne? Naso matanda mbeleele kati.”
6Mi sombe tomtom timar ma tilou yo na, timar raama lelen som. Tipakaam. Pa timar be tireut mete tio men tau. Mi kaimer, sombe tiyooto ma tila, to tipasaana uruŋ.
7Koŋ koi bizin ta boozomen tikamam ŋgar sananŋana pio, mi tiparmburumrum zin ma tizzo ta kembei:
8“Aa, to tiŋga, mete sananŋana kat ikami. Ko irao imaŋga mini na som. Iŋga be imeete a.”
9Mi toroŋ ŋonoono ta aŋdemeere kati mi aŋpase pini, mi niamru ambot mbata mi aŋkamam ka kini na, ni tomini itoori mi isu iwe koŋ koi.
10Yooba, lelem isaana pio, mi wit yo ma burup ma aŋmaŋga mini. Naso aŋrao be aŋpokot koŋ koi bizin mbulu kizin.
11Tana koto koŋ koi bizin. Naso aŋute: Nu lelem pio. Kokena zin nin se, mi kalŋan isala ma tiso tilip pio.
12Pa nio leŋ uunu sa isaana som. Tanata nu pombolmbol yo, mi kam yo ma aŋbotmbot kolouŋana pu totomen.
13Tapakur Yooba! Ni Anutu kizin Israel. Tapakur zaana ta buri, mi iseeŋge iseeŋge ma ila. Ŋonoono kat!