Y Salmo Sija 2:1-12

¹SA jafa na manlalalo y nasion sija, ya y taotao sija manmanjaso y banida?

²Manotojgue y ray sija gui tano, ya y prinsipe sija manafaesen entalo sija contra si Jeova, yan contra y pinalaeña, ilegñija:

³Nita yulang y guinideña, ya nasuja guiya jita y godeña.

⁴Ya y sumasaga gui langet uchumachaleg: ya y Señot jamofefea sija.

⁵Ayo nae cumuentos yan sija yan y linalaloña: ya y binibuña ninafañatsaga sija.

⁶Lao guajo japolo y rayjo gui jilo Sion, gui santos na egsojo.

⁷Guajo bae jusangan y tinagojo: si Jeova ilegña nu guajo: Lajijo jao; ya guajo julilis jao pago na jaane.

⁸Gagaoyo ya guajo junaejao ni y nasion sija pot y erensiamo ya y uttimon patte y tano, uiyomo.

⁹Ya unyulang sija ni y baran lulog; taegüije y bason y yero unyogyog sija.

¹⁰Ya pago, tingo, O ray sija: resibe finanagüe, jamyo man jues gui tano.

¹¹Setbe si Jeova ni y minaañao, yan fanmagof ni minayengyong.

¹²Chico y laje, no sea ulalálalo, ya unfanmalingo jamyo gui chalan, sa gusisija y linalaloña sinenggue. Mandichoso todos y umangoco sija guiya güiya.