Markus 7:18-34

¹⁸Haibaekpa, Yesusti sinag hailamsiogti, “A'un olog anam seneraglom kom te?” aro haibahiog. Yesusti wanaag seneraglamogti, “Nia mangkina nimiri tenaba tehonge sembe Allahri nimi eneko sembe, 'Loba,' sembalul komdi, nimiri tenaba ni tenep,” aro, “Tibin nenero ambatsinun,” sembaogti, tipto ambarelamsiog. Eldi yubu ka'ero neleptopnangag ambarelamsiogti, “Nimiri sa'a-sa'a tenba, kulomag wa'in tanena, nimi eneko sembe Allahri, 'Loba,' senelamla kom. Tam nenena, a'un wana hekto seneraglom kom te? Nimiri sa'a-sa'a tenaba terop tanena, nimi kulomag wa'irop aghana, wanaag ya'ag wa'irop kom. Nia mangkina nimiri tenaba tenba, monag tisirikag wa'irop aghana nen lambanep,” seog. Eldi yubu lebogne neneag agha, “Nia mangkina tenaba waliri, nimiri terop, tanena Allahri, 'Loba,' sembalul kom,” aro tam karepto pibog.

²⁰Wene seogti, nen ambarelamsiogti, “Nimiri wanaag agha lero uropne sembe Allahri, 'Loba,' sembanep.

²¹Nimiri wanaag agha lero uropne nenena, 'Undo unuahane,' aro seneragtopne agha mali-malia lelamlari ulamla. Nimiri wanaag agha seneraghongkia mali-malia ulamangnena: kelabo nengabo toptangkamna komne salik-malik tektangtop, ora nimiri kelabo nengabo sembe, 'Naringe wamsoba saelbahane,' aro pelepsirop, nimiringe haogha torop, nimi ya'ag ohirop, aboapti, topsene senerop, yoaba uahane senerop, orolena lerop, nimiri wana bobongeag agha ali neneptangtopne urop, yog nimiringe sembe naringeog wamso senerop, nimi san lerop, metmereng arop, wanaag seneragna koma ua urop,

²³Ni lemnange tanena, nimiri wanaag agha seneraghongkia unulamlange sembe undo unurop nimi eneko sembe Allahri, 'Loba,' sembahinep,” seog.

²⁴Wene seogti, Yesusti mog so'o Galilea laplobi agha mog so'o Tirus peramag piog. Piogti, “Tektek papto wamnun,” sembaogti, “Nimiri imneikag,” aro ae nhonag wa'iogti, wamog. Wamog aghana, nimiri el yal aro el taek.

²⁵Kelabo nhon elmangkel phia yonge kulomag wamog kel enekori ka'elamogpa, “Yesus yal,” ana ka'ebaog. “Yal,” ana ka'ebaog abeneko pere keleneko yingkina “Yesus kipnun,” aro el whingag yabu sanukto uamupto malingkiog.

²⁶Yesus sekamogpa, yanag malingkiogti, Yesusag mololamogti, “Namangkelag phia yonge wamlaba, yamendi, yaglambalulam,” aro wanaag agha sarikto-sarikto molbaog. Molbaog aghana, keleneko nimi sisa Yahudi kel kom. Mog so'o Siria as nhon Penisia peram wamogneag agha mangkaek kel wamogpog, Yesus whingag mololaog.

²⁷Molbaogpa, Yesusti kel enekoag lelamogti, “Nimiri sikinmabo sam kwaneng tarelamsiangdi, amik kam kwaneng tarelamang. Kwaneng me ologneri saeag agha pelepto kamag tobogsin tanena mali. Ane saog uro na yog asag nimi sam yebel phinep kom. Namabo Yahdudinang nari yubu ka'ero neleptopnang sam komopto yepsisene taneogna, nimi sisa Yahudi kom nimi amik yebel phinep,” seog.

²⁸Seogpa, kelenekori, “Mikip phelektopne wamlari, ologha sirikagne tatneho,” aro wanaag seneraglamogti, lelamogti, “Nai, otsik leplam. Aghana kwaneng meri telamnaba, ubun pelengloropne kam umag ua tokto toro tenep,” seog.

²⁹Seogpa, Yesusti elag lelamogti, “Andi samoro ambatnelamne wali leplam. Andi molbanelamne wene uro yabil ane sembe, hae pululam. Phia yonge andi kelme kulomag agha lambal,” seog.

³⁰“Lambal,” seogpa, keleneko eldi aeag piog. Piogti kemelamogpa, elmangkelag phia yonge kulomag wamogne neneko lambaogpa, keleneko tektek papto marobag malamog.

³¹Wamogha Yesus Tirus mog so'o aneko laplobi agha, Sidon ina agha palamog. Palamogti, mag sin Galilea peramag phibom agha heng walelingkirobag sip mog so'o si As Sa'obare as anabi toman piog.

³²Piogti wamogpa, nimiri Yesusag nimi yubu lerop komne ao leptopne nhon payaek. Payaekti, “Sae elag pipmenba, wali talul,” aro molbaek.

³³Wene aro molbaekpa, Yesusti “Mo wamnunam,” aro yubu lerop komne ao leptopne poneko poa nimi oroghag pabiog. Pabiogpa mo wamdekti, Yesusti sae ma'al agha ao lom abenekoag tobongkibog. Tobongkibogti Yesusti sae ma'alag sulumag supto yubu lerop komne ponekori silimuag pelaghirog.

³⁴Silimuag pelaghirogti, imag tiwalengkia Yesusti hain nubu uro ebaogti, pho aro lelamogti, “Efata,” seog. Yahudi nimiri lerop yubuag “Efata,” seognena, nuri yubuag “Kube,” aro lebog.