Markus 6:33-55

³³Pali na tahuna ri vano, e huriki ala kupo ri matai ria, ri matakilala ria, lakea e huriki na tanga lobo ri nunu pololilo, ri bele muga vonga.

³⁴Na tahuna e Isu i bele, i matai ria, i dodo ria, a vuhuna ri manga a sipsip, i uka matakari ne ria. Lakea i vakatubu ni tovo ria na maki i kupo.

³⁵I tabalahehe pali a haro, lakea e huriki a murimuri vona ri takia, ri ta maea, “Ra hini nga a tabeke i ngeki, i tabalahehe pali a haro.

³⁶O rudu e huriki, ri gi lakea na robo viliha nga, na maka tanga, ri gi kona a maki ni kani.”

³⁷E Isu i koli, i ta maea, “Mu vakani ria!” Ri ta maea ria, “A moni ni kona a maki ni kani ne ria vona bara i vatovotovo turana mapana viri i leho na keva i polotolu! Pali i uka ma i kamumu si gi kona a maki ni kani ne ria.”

³⁸Lakea i nana ria, “I riva a bret mu tahoka? Mu vano mu matai.” Ri matai pali, ri hamule, ri vakalongoa e Isu ri ta maea, “A bret i lima, a manu i rua.”

³⁹Lakea e Isu i vakuku e huriki ri gi made vapopo na varili gomagoma.

⁴⁰Ri made vapopo na tara ala ravulu mule ma a murina balaka taku (100) ranga, na tara ala ravulu lima (50) ranga.

⁴¹I bole a bret i lima, a manu i rua, i mata rike na hunu, i kavurikea a Vure. Muri i keve a bret, i habi ne huriki a murimuri vona, ri veru ne huriki. A manu i rua ranga i putu, i veru ne huriki.

⁴²E huriki lobo ri kani, ri maru.

⁴³E huriki a murimuri vona ri tahoni na kulopi i ravulu a polona i rua, a kalavana bret a manu ri kani kaleva.

⁴⁴E huriki a bakovi lobo ri kani ri ala 5,000.

⁴⁵Malaviriri kunana e Isu i rudu e huriki a murimuri vona, ri gi rike na aga, ri gi muga lakea o Betsaida, na tabeke tara na darilomu. Pali i made mule ia, ge rupolo kamumu e huriki.

⁴⁶I rupolo lobo e huriki, lakea i sike na gagana lolo, i vasileki.

⁴⁷I rodo ngane a hini, e huriki a murimuri ne Isu ri vore na kurukuruna darilomu. Pali e Isu i tabana na lolo.

⁴⁸I matai e huriki a murimuri vona ri vanugu a vore, a vuhuna a vilu i pori valai muga. Na malabeonga e Isu i pori mai ria, i laho langa na dari. I popote kunana ge rede ria,

⁴⁹pali na tahuna ri masia i laho langa na dari, ri pahaluhoi ta ia a hanitu. Lakea ri haloho,

⁵⁰a vuhuna ria lobo ri masia, ri mangenge. I malaviriri kunana i ta maea, “Mu tuhaka! Iau kunana. Naha ni mangenge.”

⁵¹Muri e Isu i rike na aga, lakea a vilu i pasi puru. Ri turutu hateka,

⁵²a vuhuna i uka ma ri matakilaka vona a nivakasiri e Isu i ratea na bret. I tabana ni uvo a gine ria.

⁵³Ri vore kudu, ri bele o Genesaret, ri hori vonga.

⁵⁴Na tahuna ri raga na aga, e huriki lobo ri matakilalea e Isu.

⁵⁵Ri nunu lae na tabeke vonga, ri vakalongo e huriki. Na tahuna e huriki ri longo, ri kaloho na dede e huriki ri giloa, ri bole lakea vona.