Mark 6:33-55

³³Kabay dee dad to mite kdàla, na dilèla ale. Taman gasil ale tmanà mdà di kdee dad lunsud, na dad to én guna kel di gusalu ale Dyisas.

³⁴Na di ktufa Dyisas mdà di aweng, teenan dee dad to déén. Na toon ale kando du salngad ale i bilibili landè to mifat dun. Taman dee tdoan dale.

³⁵Na di kaflabin salu dad gal mlalò ku Dyisas di safédan, na manla, “Taflabi nan, na landè gumnè mdadong dini.

³⁶Fye ku fdaam dad to du fye mngabal ale gumayadla knaan di dad gumnè na dad malnak banwe mdadong dini.”

³⁷Kabay tnimelan ale, manan, “Gamu sa mlé dale knaan.” Na manla di kenen, “Kayeam ku gami mayad knaan kdee dad to ani? Mti taden di walu bulen i bayad dun.”

³⁸Na man Dyisas, “File batù i fan nebeyu? Neyeyu sa kun.” Na di keyela dun manla, “Alò lime batù fan na lwe nalaf.”

³⁹Na dek Dyisas i dad to sudeng di bnas di dad sahal lumbuk.

⁴⁰Na slumbuk ale sudeng, nun mlatu to na nun lime falò dad to di kat lumbuk.

⁴¹Na nwè Dyisas i lime batù fan na lwe nalaf, na lngalà kenen di langit du dmasal mlé fye di Dwata, na snatngaan i fan, na blén di dad gal mlalò kenen du nalella di dad to. Na nalelan lwe nalaf di kdeela.

⁴²Na gamkaan i kdeela, na bsol ale.

⁴³Na santifun dad gal mlalò kenen i lukasan, na fnò sfalò lwe been i gdèla fan na nalaf.

⁴⁴Na kdee dad lagi kmaan lime libu.

⁴⁵Kafngela kmaan dek Dyisas muna dad gal mlalò kenen maweng di banwe Bétsayda di faltù bong lanaw. Na kafnge én, fdaan dad to.

⁴⁶Kafngen fdà dad to, mnagad kenen di satu bulul du dmasal di Dwata.

⁴⁷Di kbutangan, ditù fa i aweng dad gal mlalò kenen di talà lanaw, na Dyisas aloan satu gtagak di kilil.

⁴⁸Na teen Dyisas too maflayam dad gal mlalò kenen kamwa awengla du gsitongla i too mgal nus. Taman tamayè mwal salu Dyisas di dale tatì magu di tah lanaw, na tafanan ale nlius.

⁴⁹Kabay di kitela kenen tatì magu di tah lanaw, làla dilè, na man nawala lmagol kenen. Na mkit ale,

⁵⁰du kdeela mite kenen na too ale likò. Kabay gasil talù Dyisas di dale, manan, “Fangalyu nawayu du agu sa ani. Nang gamu likò.”

⁵¹Na di kyak Dyisas di awengla, manak i nus. Na too tikeng dad gal mlalò kenen, na too msamuk fandamla tan duen tatì manak i nus.

⁵²Hae, du balù tateenla tnikeng nimò Dyisas di fan, knean là ale gamlabat du mgal ulula.

⁵³Na fles ale mifal di lanaw na ditù gudmuungla di banwe Génésarét, na ikatla awengla.

⁵⁴Na di ktufa ale Dyisas di aweng, dad to mnè déén dmilè kenen.

⁵⁵Na taman faflal ale fgadè kdee dad to nun tduk di klamang banwela, na balù nè lingela gusalun déén, nebela dad to nun tduk gagin gumilèla salu di kenen.