Mak 6:33-55

³³Ma kegha da wawaya peyarisi ikitisi da inenae na ivogiinisi. Tuna kubiine wawaya i kwanatu bogii ma bogiiyai kaetanowai iverau. Ivi nao da makii katamanisi ma murisiyai Yesu ina aposol yavata inekiibau.

³⁴Yesu iwota ma koroto ghamana ikitisi da ivi kamyuyuwesi, iyamna kii kita nakanani ma sipu kii koyakoyagha kegha. Tuna kubiine ivi karei da kurisi na vibeyebeyena bogii ma bogiiyai iberaberai.

³⁵Ravi ipika na kana kivikivina ipisi ma Yesu kurina ivona bo, “Weni dobuna na makiiwapana ma namada mara ikovi.

³⁶Wawaya kevonatawesi ina nae da iyavo kava ririnai emakamakai, ti na kwanatu viya kamosiyai ma bade dipiiyai na gwabisiyai vavai ina gimara da ina kam.”

³⁷Ma Yesu ivonapotesi bo, “Kegha. Tami vavai koveresi da ina kam.” Ma ivonapotei bo, “Te! Mane irakata ghagha! Imapatana taviiya da parawa tagimari ma weni korotona tikanisi?”

³⁸Ma Yesu ivi tarakiiyanesi bo, “Parawa viya gwabimiyai? Konae da kona kitai.” Ikitai ikovi ma ivona bo, “Parawa miikovi ma iyana ruwa weni.”

³⁹Muriyai kana kivikivina ivonesi da koroto ghamana ita yaraghi da i gawara nununai ita makai.

⁴⁰Ma vaghina, nani korotona iyaraghi da viya na 100 ma viya na 50. Ma peyarisi inamona tepanai imakiipika.

⁴¹Ma Yesu na parawa miikovi ma iyana ruwa iviiya ma itepa ku kunuma da God ivi kiikiiwei. Ma parawa ivogimai ma kana kivikivina iveresi da ita rereghi koroto ghamana kurisi. Ma bade iyana ivogiiya ma iveresi da irereghi.

⁴²Ma peyarisi ikam da ikam dodo.

⁴³Ma murinai kana kivikivina puwata iyuna da kode 12 ivi tupoi.

⁴⁴Ma nani korotona kamonai tomotomowa kava ivi yavi na 5 tausan.

⁴⁵Yaghiyaghinai Yesu kana kivikivina ivi gerusi ma ivonatawesi ivi nao da Gariri tokana ita damana ku Betsaida kwanatuna. Ma tuna ita makai da koroto ita vonatawesi ita nae.

⁴⁶Koroto ivi kiruruwesi ikovi na ighae ku koya da ita nipowana.

⁴⁷Ivi didibari ma i waka na toka basunai. Ma Yesu ina kina kava na tanowai

⁴⁸ma ikitataweyana da kana kivikivina wakiiyai ivivi paparana, yanunu ivoivoi potepotei. Mara tomtom nubakutuvina kamonai, Yesu okowa tepanai ibaba inenae da namada kurisi inenekiibau. Ita kiivuresi iti nao

⁴⁹ma kana kivikivina ikitai da wawaya sago okowa tepanai ibababa, ma ti inotai da momosika da peyarisi ikiirara

⁵⁰ma iyabumana kirakai. Yaghiyaghinai ivonesi bo, “Ami nota ke ina gisi. Wena taku. Ke kona yabumana.”

⁵¹Muriyai ku waka igeru ma yanunu inuba. Ma kana kivikivina inota kavakavai,

⁵²iyamna ikikava Yesu parawa iviiya da bera ghamana iberai na ke ita nota kamowi. Nuwanuwasi patana da guduguduna.

⁵³Yesu kana kivikivina yavata toka idamani ku dobu kana vava Genesaret ma iwota.

⁵⁴Wakiiyai iororu ma yaghiyaghinai wawaya ivogiini da tuna Yesu.

⁵⁵Wawayisi iverau da nani dobuna ine yavui, i wawaya gubagubagisi ritowai ikavakavarisi Yesu kurina.