Maku 6:33-55

³³Yrome tonese ynororo tuhkãkomo a aytoryhtao. Morara exiryke tutuarõtase toto. Zuapõmase toh toytose tururume pata tõ poe, tuna ehpikuroko.

³⁴Morarame towomyryhtao kanawae ahno imoity tonese eya. Toenupunase ynororo toto poko okyno tõ sã toto exiryke, tosẽkãkara samo. Morara exiryke tamorepase toto eya itamurume.

³⁵Morarame kokonie pukuro toehse ahtao ipoetory tõ tooehse eya. Ynara tykase toto Jezu a, —Ahno esary kara sero. Moxiã aropoko ropa pata tõ pona. Kohmãnõko nase.

³⁶Tynapyrykõ epekahtohme aropoko toto, tykase toh repe.

³⁷Yrome Jezu a tozuhse toto, —Autuhmatoko toto, tykase ynororo eya xine. —Oty ke? tykase toto. —Yna ytory se hma wyi epekahse? Tineru 200mã ke wyi topekahse ahtao ipune pyra mana, ahno tuhke exiryke, tykase toto tosẽkomo a.

³⁸—Otãto wyi nahe? Enetoko keh aporo, tykase ynororo eya xine. Mame toytose toto enese. —Omame wyi pisarara nae nase. Kana roropa asakoro nae nase, tykase toto eya.

³⁹Morarame typorohkapose toto atakenaka ona hpoty htaka.

⁴⁰Typorohse toto emero.

⁴¹Mame wyi tapoise tyya ahtao kana maro, kakoxi tõsenuhmase ynororo, —Kure mase Papa, tykase ynororo. Moromeĩpo wyi tytohtohkase eya typoetory a ekarotohme imoihmãkomo a ekarotohme. Kana roropa tapiakase eya emero toto zopatohme.

⁴²Tõtuhse toto tuesapare toh toehse rahkene, emero.

⁴³Mame tõsẽ akoĩpyry tanỹse ropa eya xine, 12me ruto pehme wyi akoĩpyry maro.

⁴⁴Mokaro autuhtyã orutua kõ rokẽ ahtao, tuhke exiry 5.000me kynexine toto.

⁴⁵Morarame typoetory tõ tyripose ropa kanawaka, osemazuhme toto atakuohtohme mõpozakoxi, Petesaita pona. Jezu moroto ro kynexine. Imoihmãkõ osekazumary tyya eraximãko kynexine.

⁴⁶Morarame tõsekazumakehse toto ahtao toytose Jezu ypy pona oturuse Tumy maro, Ritonõpo maro.

⁴⁷Mame tykohmãse ahtao, ipoetory tõ tuna rãnao toh kynexine. Jezu rokẽ toiroro kynexine ipũ po.

⁴⁸Mame typoetory tõ tonese eya, koehãko toto etuarimãko. Tyryrykane konõto toto ytohtome kynexine. Mame kuratiri etapitory zano, toytose ynororo typoetory tomo a. Tuna poro toytose ynororo. Kanawa kuroko toytory se kynexine repe.

⁴⁹Yrome ipoetory tomo a tunõmase tuna poro ayaytory eneryke tyya xine. —Ahno akuaryhpyry mokyro, tykase toto, tykohkohtase.

⁵⁰Eya xine Jezu tonese. Tõserehse toto emero. Yrome eya xine ynara tykase Jezu, —Juno pyra ehtoko. Ywy ase. Enaromyra ehtoko, tykase eya xine ynororo.

⁵¹Mame kanawaka tõtyrise ropa ynororo. Mame tyryrykane tymynyhpãkapose. Moro eneryke tyya xine tõsenuruhkase toto ipoetory tõ itamurume onenetupuhpyra ro toexirykõke.

⁵²Wyi emãkapotopõpyry poko eya tuenikehse toto, onenetupuhpyra ro toexirykõke.

⁵³Morarame tãtakuohse toh rahkene Kenezare pona Jezu maro. Kanawa tymyhse eya xine.

⁵⁴Mame aowomyryhtao Jezu tonetupuhse imehnomo a.

⁵⁵Tururume toytose toto kurãkõkara enehse. Toto etueh tapo tonehse toto a Jezu a toto kurãkatohme ropa. Emero rokẽ kurãkõkara tukurãkase ropa eya.