SAN MARCOS 6:33-55

³³Pero anto tsje chojni vicon are sacjoi co joatsoan na Jesús. Mexinxin anto tsje chojni de tsje rajna coinga na joichonhe na nttiha co icha saho joiji cain jehe na que Jesús.

³⁴Co are Jesús vac̈hjexin de ngá barco, vicon anto tsje chojni nttiha iná, co Jesús coiaconoehe na ixin jehe na sín na nttiha ẍá coleco que ẍonhi chojni ttingaria. Co Jesús coexinhi joinchecoenhe na nttiha tsje cosa de ixin Dios.

³⁵Co are ocotsocjin chojni que vacao Jesús joí na ngain co ndac̈ho na: ―Otsocjin co nttihi ẍonhi nchiandoha chojni te.

³⁶Ttetonhe cain chojni satsji na tti jí nchia o rajna icha chian para siquehna na tti sine na, ixin ẍonhi chonda na.

³⁷Co Jesús ndac̈ho: ―Jaha ra danjo ra tti sine na. Co jehe na ndac̈ho na: ―¿Queẍén janha na tsji na siquehna na niottja para sine cainxin chojni yá? Ixin tomi que sitte cain niottja que sine cain chojni yá inchin tsjexin tomi que dacha ná ninchehe ẍa yáto conittjao.

³⁸Co Jesús ndac̈ho ngain na: ―¿Quejanhi niottja chonda ra? Sattji ra ditsjehe ra. Co are jehe na conohe na quejanhi niottja techonda na, joí na co ndac̈ho na ngain Jesús: ―Jí naho niottja co yó copescado.

³⁹Cottimeja Jesús coetonhe cainxin chojni para tavintte na grupochjan co grupochjan ngataha cachji.

⁴⁰Co tavintte na de cien na co de cincuenta na ngataha cachji.

⁴¹Cottimeja Jesús coá tti naho niottja co tti yó copescado co tsjehe para noi co chjé gracias ngain Dios. Cottimeja váña niottja co copescado co chjé chojni que vacao para conchjeyehe na cainxin chojni.

⁴²Co cainxin chojni joine na co cojehe na jian.

⁴³Cottimeja ẍa joinchecaon na tteyó nttaẍa de tti xexin joine na, de niottja co copescado.

⁴⁴Co jeho xí que joine niottja mé cjoi naho mil xa.

⁴⁵Cottimeja Jesús coetonhe chojni que vacao para coani na barco co coattoa na lago para sacjoi na ngain rajna Betsaida icha saho que jehe. Co Jesús vittohe nttiha para jindache chojni que onchao sasinttecji na.

⁴⁶Co are cainxin chojni sacjoi, Jesús sacjoi para ngagaha ná jna para joinchecoanxinxin Dios.

⁴⁷Co are ondaconttie, barco ojoiji ngosine jinda, co vé jeho Jesús vittohe nttiha.

⁴⁸Co Jesús vicon ixin anto tangui tedeca na barco ixin c̈hintto anto soji joixin c̈hintto de tti satettji na. Co ndoyo mé Jesús coingachjetaha jinda co sacjoi hasta tti ngain na co jehe joinchehe inchin rrogatto nao.

⁴⁹Pero are jehe na vicon na Jesús sajittji conixin rotté ngataonhe jinda, jehe na ẍaxaon na ixin mé ná nttanchanha, co coyao na

⁵⁰ixin cainxin na vicon na co anto ẍaon na. Pero Jesús nichja ngain na co ndac̈ho: ―Ẍaonha ra, janha joihi.

⁵¹Co coani barco tti tengá na, co rato mé tavehe c̈hintto. Jehe na anto ẍaon na co anto goan na admirado

⁵²ixin ẍa coinxinha na quehe rroc̈ho tti joinchehe Jesús conixin niottja. Ixin ẍa cha ansén na.

⁵³Coattoa na lago mé co joiji na nonttehe Genesaret. Co nttiha coenc̈hoa na barco ngandehe jinda.

⁵⁴Co are vaniaxin na de barco, chojni que te nttiha anto daca joatsoan na Jesús.

⁵⁵Co anto daca joinchenohe chó na ngoixin región nttiha. Co cainxin lugar tti sacjoi Jesús, joicao na ninihi conixin camilla ngain Jesús.