San Marcw 6:33-55

³³Per dád zien ree bejn baguiaa guial zë reeman, abiꞌ bayünbee reeman laa reeman zeel zien ree bejn brii luguiedx guin ree ruxüün reeman, abiꞌ yalojl laa reeman bidxin lod zë Jesús con ree xbejnman.

³⁴Chi baguiajt Jesús loj barcw guin, baguiaaman bén guixiuj rigaꞌ yagaj, abiꞌ bayaman laa reeman guial zaꞌ reeman ziꞌc xiil achut rajp. Dxel guzuloj balüüman laa reeman, zien ree ni balüüman laa reeman.

³⁵Chi ma gudxe, gubig ree xbejnman, rëb reeman lojman: ―Ma gudxe yan, abiꞌ achut bejn zojb niz guie.

³⁶Güjdx loj ree bén guin din che reeman ranch ree në ree guiedx ni rigaꞌ gajxh chisii xhienin gaw reeman.

³⁷Per rëb Jesús loj reeman: ―Lëjt gol badëëd ni gaw reeman. Dxel rëb reeman lojman: ―Per zroꞌ daꞌt milia ryaadx din yoꞌ ni gaw ree bén guin, ziꞌct ni rüjn bejn gan loj tioꞌp gayuu dxej.

³⁸Abiꞌ rëb Jesús loj reeman: ―¿Bël guiadxtil caꞌdi? Gol baguiaa don. Chi baguiaa reeman, dxel rëb reeman: ―Gaay guiadxtil con zatioꞌp bëjl.

³⁹Dxel gunabeeman din cwe tibcwaa gaj reeman loj guixyaꞌ.

⁴⁰Zianz gurej reeman zian, yuꞌ lod gure tibgayuu reeman, yuꞌ lod gure tüꞌpchii reeman.

⁴¹Abiꞌ cwaꞌ Jesús guigaay guiadxtil guin con grop bëjl guin. Dxel gules lojman xanyabaa, badëëman quixtëë loj Dios, gulaꞌman guiadxtil guin badëëman loj ree xbejnman persi gudiꞌs reeman laan loj ree bén rigaꞌ, gudiꞌs tëëman grop bëjl guin loj gra reeman.

⁴²Graczi reeman gudaw xt bigdxinladx reeman,

⁴³abiꞌ staczi bacha reeman chiptioꞌp dxüm guiadxtil laay con bëjl ni bayaꞌn.

⁴⁴Loj ree bén gudaw noꞌch cost gaay mil xinguiaaw.

⁴⁵Dxel gunabee Jesús guyu ree xbejnman loj barcw din tëdgaj reeman stiblad roꞌ nijs par guidxin reeman Betsaida, laꞌtgaj cuzaadiidxnëman benzien guin ree.

⁴⁶Chi gulox bazaadiidxnëman laa reeman, wejman guijc tijb guiaꞌ, persi gurejdx gunabaman Dios.

⁴⁷Chi ma cabej guiaal, ma yuꞌ barcw guin galay nijs guiáad Jesús bayaꞌn xtijbzaman guijc guiaꞌ guin.

⁴⁸Dxel baguiaaman dád cazagdiaj ree xbejnman cusa reeman barcw guin guial rliaj bi niz loj barcw guin. Abiꞌ chi ma cayreguiaal zibig Jesús loj reeman cazaman loj nijs guin, beenman ziꞌc bén tëdnejz.

⁴⁹Chi baguiaa reeman cazaman loj nijs guin gunaladx reeman sprijt malan, abiꞌ gurixdiaj reeman.

⁵⁰Dád cadxeb reeman por ni cuguiaa reeman. Per guneenë Jesús laa reeman rëbaman: ―¡Gol baguꞌ luxdoodi, ad bal rdxebidi, najn!

⁵¹Dxel guyuman loj barcw guin, zianz gulëjz bi guin. Guiáad laa reeman dád badxa loj reeman,

⁵²din nayaaw xquiarguiejn reeman, abiꞌ ad bigniaꞌt reeman milagr ni beenman con guiadxtil guin ree.

⁵³Chi ma gudëd reeman lojnijs guin bidxin reeman xdajn ree bén Genesaret, yagaj guxhii reeman barcw guin roꞌ nijs.

⁵⁴Naabzi baguiajt reeman loj barcw guin, laa bayünbee gajc ree bejn Jesús.

⁵⁵Abiꞌ gutieꞌch reeman diidx guidib niz yagaj. Dxel guzuloj zinë ree bejn bénragxuu ree lod riguiejntzi reeman zaꞌ Jesús.