Marafanna Falane 2:5-13

⁵Ɛ n sɛnbɛ so se bogine ra, ɛ yi n bɔɲɛn maxunbeli mangon bogine ra, bayo xanuntenyaan furena n ma.

⁶A kɔmɛn ma yiina n xunna bun, a yi a yiifanna rabilin n ma.

⁷Yerusalɛn sungutunne, n bata ɛ rakɔlɔ bolene nun burunna xɛnle yi, ɛ nama xanuntenyaan nakeli, ɛ nama a raxulun, benun a waxatin xa a li.

⁸N bata n xanuntenna xuiin mɛ! A fama tuganɲɛ ayi geyane xun tagi, a a gima yire matexine xun tagi.

⁹N xanuntenna a gima alo bolena hanma xɛli sɛnbɛmana. A mato, a tixi en konna sansanna xanbi ra. A yɛɛn nasoma banxin foyesoden na, a yɛɛ masama wure sansanna yinle ra.

¹⁰N xanuntenna falan tima n xa, a naxa, “Keli, n xanunten tofaɲina, fa en siga!

¹¹Bayo ɲɛmɛn ɲanmatɔɔn ni i ra, tulen bata ɲan, a bata siga.

¹²Se fuge faɲine bata wara ayi bɔxɔni, sigi sa waxatin bata a li, kolokondene xuiin minima burunna ra.

¹³Xɔdɛ binla bata a bogi singene ramini fɔlɔ, manpa binle bata fuga, e xiri faɲin naminima. N xanuntenna, keli, fa en siga.”