Maka 8:6-26

⁶Motong la Yesu iwete pang di tooltool malala mai tina be du tiwur tana. Inbe ikap porong tina yo limi be ru nga, a iwete lo ponana ki pang Maro ye. Motong la itepalapala, inbe ikap pang di galiunu be la timalimi di tooltool tina ye. Ngan le di galiunu tina ngan tiyei ben yo iwete pang di nga.

⁷Inbe di ngan i kidi paranga pattu lapau, le nga tikap pang Yesu a iwete lo ponana ki pang Maro ye. Motong la iwete pang di galiunu be la timalimi di tooltool tina ngan ye.

⁸Ngan le di tooltool tina ngan tikan le kapodi sung dook mata. Motong la Yesu di galiunu tiwinoko kaningi naunu naunu tina yo iken, ngan a tipadid ye karei limi be ru le lo ipon.

⁹Ngan di tooltool tina yo tigaua a tikan so nga, ngan kinkatingi kidi ben 4,000. Le nga tikan so a imot, motong la Yesu itar di a timulumulu a tila.

¹⁰Motong la palbe leu be iye di galiunu tiyiri ye ookoo kidi, inbe tikooi a tisiut a tila pang tana mai Dalmanuta nga.

¹¹Tila pombe Dalmanuta a tiyepe, motong la di Paresi pattu timan a man tiye Yesu tiwetewete a tiparsu ye betanga. Ngan lodi be titoua, le nga titoru be iyeie mos sa a iyei tarkilanga panga ben Maro yo iyepe ye malala ki ete ni, in la iwanga a isi i.

¹²Bong ngan Yesu lon moo mai san ye di. Le nga iyei ne, “Nga yelei be ang tooltool yo ke nookoot nga kator be kakamata mos sa a iyei tarkilanga pau nga? Awete pang moolmool nen, au i o ke be apatnaia tarkilanga sa a kakamata, ngan tiap.”

¹³Motong la iyege di tooltool tina ngan sila tiyepe, inbe iye di galiunu timulu a du tiyiri lo ookoo pono, motong la tipie a tila pang ran koonoo kapala nga.

¹⁴Yesu di galiunu lodi kalli le mala be tikap touo porong dukumu sa mulu tiap, bong dukumu ataleu la tikauu a idu ookoo pono i.

¹⁵Motong la Yesu ikap noonoongoo pang di nen, “Kin kakap tutang, inbe kakawai yang dook leu ye yis kidi Paresi tiye Erot.”

¹⁶Ye kene yo di galiunu tilongo Yesu iwetewete ye so mitiap tani yo ilo ye porong ngan iyeii a isung le imot in nga, ngan di tapdi tiwetewete a tiyei ne, “Iwete nen nga, yesoo ye yo lod kalli le takap touo porong siap nga.”

¹⁷Bong ngan Yesu lon galanga ye so yo tiwetewete ye ngan oo, le nga itor di. Iyei ne, “Ai, nga yelei be ang tapmim kawetewete ye yo kakap touo porong siap nga? Ang nga kakamata so yo ayei nga, e lomim galanga yau tiao, too? Ang nga o kutomim mede dawa ben pat, too?

¹⁸Ang nga matamim, bong nga yelei a kakamata so sa ye tiap nga? Inbe ang nga talngamim, bong nga yelei a kalongo betanga ye tiap nga? Ang nga o lomim tut pitiap yege, too?

¹⁹Oo, ye kene yo atepalapala porong dukumu limi pang di tooltool 5,000 ye in nga, ngan le kapadid karei pi ye porong naunu naunu tina le lo ipon nga?” Ngan di galiunu tina ngan tiyei ne, “Karei sangaul be ru.”

²⁰Motong la itor di mulu nen, “Inbe ye kene yo atepalapala porong dukumu limi be ru pang di tooltool 4,000 ye in nga, ngan le kapadid karei pi ye porong naunu naunu tina le lo ipon nga?” Ngan tiyei ne, “Karei limi be ru.”

²¹Motong la Yesu iwete pang di nen, “Ngan nga yelei a le lomim galanga pitiao nga?”

²²Yesu iye di galiunu tina ngan tila pombe Betsaida, motong la di tooltool pattu tikaua tool atu yo matan kis in a timan pang ye Yesu. Timan, motong la tiwete panga, inbe timangmang ye be itara baene lo ye tool tani a be nen ngan matana dook mata.

²³Le nga Yesu itoko tool tani yo matan kis in baene, inbe idede a yaru tidu ke diki ke malala tani in. Motong la ikoronai ngoonoo ilo ye tool tani in matana, inbe itara baene lo pono. Inbe itoru nen, “Kumata so sa lapau, too?”

²⁴Ngan tool tani in matana pang ete, inbe iwete nen, “E, akamata di tooltool tipa, bong igalanga tiap, dawa ben kai ila be iman nga.”

²⁵Tina iwete nen nga, le Yesu itara baene mulu lo ye tool tani in matana. Ngan le matana irere le dook mata, inbe ikamata so le imot iken mallangana.

²⁶Motong la Yesu iwete panga nen, “Kin kupa le kulo malala lono be, bong kupa so le kudi rumu kiong.”