Marko 8:6-26

⁶Yokanatna wa gixolune yine tuplatinripna chiji. Kashichlu wa payokgiprerutu jimapro. Poyagnutatka. Jiknajrotlu. Wa renekna yimaklene rutspamtinripna. Reneksatna gixolune yine.

⁷Waneyna psotsotaji shima wgenkaka. Wale giglenshinikanyegitlo. Wa yokanatna rutspamtinripna. Rutspamtna gixolune yine yegi.

⁸Nikatkana. Jinanna. Koschekluna wa gixetachri psojkaka payokgipre kojitaya.

⁹Wanegetkona gepkoxamkoje waragka yine. Yokanatatkana.

¹⁰Waneklutka ratskota wa kanawa yimakleneyma. Wane ya Talmanutasreta.

¹¹Runna Gwariseyone. Yinuwaka yoptopiiretluna. Rujgaluna Waleya getkaluru tengogne gajeru. Yantaletluna.

¹²Wamonuwnalenshinikanuya kosennipgyapotuta. Wane china, “¿Klu chinanu rujgaluna getkaluru tye gimuweekakgognenatachine? Galikaka wane nchingi, gi wa reneekona getkaluru tye gimuweekakgognenatachine.”

¹³Kaspukatkana. Kanawa ratskotatnaka. Wakanu ya.

¹⁴Ramtaka gwalemtluna nikanruna. Maleshayna. Satupje jimapro waneyna wa kanawa.

¹⁵Yokanatna Geso. Wane china, “Xako. Ggirukotinwa wa gisekachriya wa Gwariseyonenu, wa gisekachri koxa Girorenenu.”

¹⁶Yoptopirkakna wannakakluko. Wane chinkakna, “Jimapro maleshaywu.”

¹⁷Geso gimatlu. Wane chinna Wale, “¿Klu gyoptopirkakya wa maleshaygi jimapro? ¿Gi ge gishinikanuwatawa? ¿Gi ge gimata jemanatawa? ¿Waneygi shikolu gaji?

¹⁸Kaygalmakgi ¿gi ge geta? Kajnakmakgi ¿gi ge gjema? ¿Gi ge gishinika? Wa njiknajrotinitkalu pamyo jimapro wa pamyo waragkaneya ¿gi pejnu kojita katsepo wa psojkaka gkoschekyatkalu gixa?”

¹⁹Wanna wane chinru, “Pamole gepi kojita.”

²⁰“Wa payokgipre jimapro wa gepkoxamkoje waragkaneya ¿gi pejnu kojita katsepo wa psojkaka gkoschekyatkalu gixa?” Wanna wane china, “Payokgipre kojita.”

²¹Wane chinna Geso, “¿Gi ge gimata jemawalu?”

²²Rapokna Wetsayta. Rawapluna Wale yegi satu maygaletu. Ragjitluna kamrukyaplu.

²³Geso kanjimtlu wa maygaletu. Raniklu pokchi kegneteya. Gitskaga sagaygaletlu. Rogwaka rutakamyoyegitlu. Repomgalu, “¿Gi ge petlu pa gixanu?”

²⁴Rumrekgata. Wane china, “Netna yine, wa yanachine wa gagmuna pixka gixachine neta.”

²⁵Rumepe gitakamyoyegletatnaklu wa giygale. Waneklu retatka. Ruglewatatka. Retashpotutatka gowuka ptowrupotuko.

²⁶Geso yokanatatkalu gipji. Wane chinru, “Gi wa pokchiko pyanu.”