Luuka 7:1-43

¹Eeshiyeevo mattakhuzi apale aari owoozaaye atthu, khweetta sitate ya Kafaranawu.

²Ottuukho aariwo namalokozela mmote wa anajanka w'eerooma, aariina karumeyaawe wompheta aari olwaaziwaaye khusala asaleela ofwa.

³Wakathi namalokozela wa anajanka otule asiiliyeevo monkoni wa Yinsa, khuwaaperekha attunkhulu akina amayaahuuti yoori anvekele Yinsa ate anvonise.

⁴Yo n'onsikana khunvekela wookhanyarelavo araka: “Mwinyi oto onsuhi waawuniwa,

⁵mwaasa yoori oniiya owaapheta atthu etthu na anijekela nyuupa yoosifwiwamo Nnyizinku.”

⁶Aphano Yinsa khulankha khusala alawa vamote na-yo, asaleelaka ofiya, namalokozela otule khuwaaruma ashirikha awe olawa omuuza yoori: “Mbwana, ohijantipu khinsuhi weeyo ovira nnyupa mwaka.

⁷Ti eto miiyo kinoona yoori akinsuhi okutthanana weeyo, ila olupe nttakhuzi limote paasi karumeyaaka ontta ovona.

⁸Miiyo kinaaye afwalume akizitiyeeyo, ila na miiyo theenya kinaaye anajanka ankishututelaaye. Kinimuuza najanka mmote yoori: ‘Olawe’, khulawa; nkina yoori: ‘Aruti’, khuruti. Kinimuuza karumeyaaka yoori: ‘Retta eti’, ye khuretta.”

⁹Yinsa asiiliyeevo mattakhuzi apale khwiiya wooshanka, khuzukuluwa khuwooza atthu apale aari omperekhaaye yoori: “Hatha Ezirayeele ottuukho akooneeniwo amini nkhama eti.”

¹⁰Ashirikha apale aarumiweeyo khurutela owawe namalokozela otule, khunsikana karumeya otule avoniye.

¹¹Mmeesho mwaya Yinsa khulankha khusala alawa sitati ya Nayiini, anakhiyoni awe na khuntti ya atthu a waatta khusala enlotta.

¹²Asaleelaka ofiya vanlako wa sitati etile, khusala asaruwa atthu aari weettelaaye ozikha. Otule aari weettelaaye ozikhiwa aari mwaana wa nunu mmote woofweliwa ti mannawe, ye aarina mwaana mmote othuuto paasi; atthu a waatta aari olawa vamote na-ye.

¹³Wakathi Mbwana Yinsa amooniyeevo nunu otule, khumoonela huruma khunkhuwela khumuuza yoori: “Ohilile!”

¹⁴Aphano khuwaasusela khusapa janaayiza, apale aathuuliyeeyo khweemela. Yinsa khulupa araka: “Shapu! Kinuuruma yoori olankhe!”

¹⁵Shapu otule khulankha khwiikhala khusala attakhula; Yinsa khumwinkha mamaawe.

¹⁶Atthu ooshi khwiiya awoova khusala ansifu Nnyizinku araka: “Napiyu nwulweene aniteela, ninoona yoori Nnyizinku aateeliye owuusuru atthu awe.”

¹⁷Hapari epile za Yinsa khumwazeyela Yudeya yooshi mpakha miti epile zaattamananiyeeyo.

¹⁸Yaahaya khuuziwa pi anakhiyoni awe vitthu epile zooshi. Ye khuwaakhuwela awiri,

¹⁹khuwaaruma yoori alawe amuuzele Mbwana yoori: “Weeyo ti otu naari onwejaaye ama ninweje nkina?”

²⁰Yo khulawa mpakha ottuukhule aariiwo Yinsa khumuuza yoori: “Neetta orumiwa ti Yaahaya yoori nite niwuuzele nkhama otule naari onwejaaye ti weyo, ama nivire ninwejaka nkina?”

²¹Wakathi otthuupule Yinsa khuwaavonisa alwele a waatta, anamarakala, apale aariina masheethwani, khuwaafunula maasho apale oohooni.

²²Aphano Yinsa khuwaajipu yoori: “Mwilawe mwamuuze Yaahaya etthiipo mooniyeezo na mwisiiliyeezo; apale oohooni antta woona, apale oorakala antta weettetta, anamakuttula antta otwahareshiwa, apale oohisiili ansiila, anamfwa asisimuliwa, na hapari zooshapweya antta olaleyeliwa asikhini.

²³Wooshapweyiwa ti otule ahiniphiiriwaaye ti miiyo.”

²⁴Anakhiyoni a Yaahaya n'oolaavo, Yinsa khusala owoozaka atthu monkoni wa Yaahaya yoori: “Makuluttu mweetteliye woona niini? Tteetthe yiinisiwaka ti pheevo?

²⁵Ama moona niini? Mwinyi mmote awaliye kuwo zooshapweya? Apale anwalaaye kuwo zootafikhana aniiya nraaha na aniikhala nkorofwa y'oofwalume.

²⁶Khi moona niini? Napiyu? Pi etthiipo kiniwuuzani yoori, Yaahaya awaaziti manapiyu akinoko aya.

²⁷Otu ti otule laari onlupaaye Nttakhuzi la Nnyizinku yoori: ‘Kinlawa kamperekhe karumeyaaka omaasho wawo yoori aattalele tarikhi yawo.’

²⁸Miiyo kiniwuuzani yoori vakatthi wa apale avokoliweeyo pi aakha, khina mmote anzitiyeeyo Yaahaya; ila otule eeyiye nttitthiiru muufwalume wa Nnyizinku, nwulweene zayita ye.”

²⁹Atthu ooshi mpakha anamariphisa lumpuru khusiila mattakhuzi a Yinsa. Yo khukhupalela shariya ya Nnyizinku, maana aari awoosiwa ti Yaahaya.

³⁰Ila mafwarizeewu na anamanozela a kano khukhijilela matakhelo a Nnyizinku khuhoosiwi ti Yaahaya.

³¹“Anaatamu apa a leelo eti kiwaalattisane niini?

³²Alattanana khuntti ya asimaana eekhaliye vaparasa akhuwelanaka araka. ‘Fweeyo n'oovumiselani phivi za vaharusi mweeyo khuhiini; khwiipa liipo la huzuni mweeyo khuhilili.’

³³Khuta Yaahaya Namoosa woofuka na ahinnywaaye viinyu, mweeyo mwinri: ‘Ye onaaye masheethwani.’

³⁴Ata Mwaana wa Pinaatamu onja na onnywa, mweeyo mwinri: ‘Mmoone nsokho otu! Nanhapaliwa, nshirikha wa anamariphisa lumpuru na anatwampi.’

³⁵Apale anlottaaye ojuwa wa Nnyizinku, anthoonyeza yoori pi wookhweeli.”

³⁶Mfwarizeewu mmote anvekeliye Yinsa yoori alawe aje owawe. N'oofiya Yinsa khwiikhala yoori aje.

³⁷Omuuta otthuupule muukha mmote wa natwampi wa sitati ethiitile, khujuwa yoori Yinsa ontta oja wa mfwarizeewu, khuthuula suupha yawe ya mafuttha oonukhela.

³⁸Khulawa khweemela onyoko wa Yinsa nshini wa moolu awe khusala alila. Mishozi zawe khusala zittonkela moolu a Yinsa. Khusala akukuttha na nyuuli zawe na opejari moolu a Yinsa avaazaka mafuttha oonukhela.

³⁹Aphano mfwarizeewu otule nawoona vitthu epile khusala alupa nroho mwawe araka: “Otu eriwaka aari napiyu eetta ojuwa yoori mwanankha otu aninsapaaye natwampi.”

⁴⁰Yinsa khumuuza Simawu yoori: “Kintakha owuuza etthu.” Simawu khujipu yoori: “Kuuzeni mwanliimu.”

⁴¹Yinsa khumuuza yoori: “Atthu awiri eetta wiiliwa nzurukhu ti mwinyi mmote aari wiipaashisakaaye, otu mmote aari wiiliwa miiya thaanu, otu nkina aari wiiliwa hamusiini.

⁴²Ila oowiiri khuhiivo mmote aawahiyeeyo onripha, ye khuwaaswaamihi oowiiri. Atthu apa awiri amphetachiyeeyo ti tuuvi?”

⁴³Simawu khujipu araka: “Kinoona yoori ti otule aswaamihiweeyo wa waattavo.” Yinsa khumuuza yoori: “Walikanisa.”