Luke 7:1-43

¹Ma nap’an ni weliy Jesus e pi thin nem ni gubin ngak e girdi’ nge mu’, me yan nga Kapernaum.

²Ma bay be’ nreb e tolang ko salthaw nu Roma u rom, ni bay ba tapigpig rok nrib t’uf rok; nre mo’on nem e ke m’ar ni be chugur ni nge yim’.

³Fa’ani rung’ag e re salthaw nib tolang nem murung’agen Jesus, me l’oeg boch e girdi’ nu Israel ni pi’ilal ngak ni ngar weniggad ngak nge yib nge chuweg e liliy rok e tapigpig rok.

⁴Marbad ngak Jesus ngu’ur weniggad ngak ni be lungurad, “Re mo’on nem e bay rogon ni ngam ayuweg.

⁵Ya ba t’uf e girdi’ rodad rok me ir e ke toy ba tafen e mu’ulung romad.”

⁶Ma aram me un Jesus ngorad ngranod. Ke chugur ko naun me l’oeg fare tolang ko salthaw boch e tafager rok ni ngrogned ngak ni nge lungurad, “Dab mu gafgownigem. Ya dariy rogog ngabang ni nga mub ngalan e naun rog,

⁷ma ku dagur finey ni bay rogog ngabang ni ngad mada’gow. Ere yugu mog ni nge chuw e m’ar rok e tapigpig rog, nge gol.

⁸Ya ku errogon gag ni kan tiyeg nga tan i pa’ boch i pilungen e salthaw, ma bay boch e salthaw nga tanginag. Ra lungug ko biney, Mman! me yan; mra lungug ko binem, Moy! me yib; mra lungug ko sib rog, Mu rin’ e biney! me rin’.”

⁹Ri gin Jesus ko re bugithin ney ni rung’ag; me cheal u luwan nge yog ngak fapi girdi’ ni pire’ ni yad be un ngak ni ga’ar, “Dawor gu pir’eg be’ nrib mich Got u wan’ ni bod gelngin nib mich Got u wan’ e cha’nem, nggog ngomed, ni mus nga Israel ma dari’ riy!”

¹⁰Me sul fa pi’inem nnol’oegrad nga tafen fare tolang ko salthaw miyad pir’eg fa’anem ni tapigpig rok nike gol.

¹¹De n’uw nap’an me yan Jesus nga bbinaw nu Nain fithingan; me un pi gachalpen ngak nge boch e girdi’ ni pire’ ni pire’.

¹²Ma nap’an ni yigi mada’ nga langan e garog ko fare binaw, me guy e girdi’ ni karbad ni ngranod ko gum’eyag. Ma re pagel ni ba’aram nike yim’ e bochi cha’ ni kari maagirag rok be’ ni bpin ni ku ke yim’ e pumo’on rok, ma bo’or e girdi’ ni kar uned ngak u lan e binaw i yib.

¹³Ma fa’ani guy Somol e re pin nem, me taganan’ ngak me ga’ar ngak fare pin, “Dakumur yor.”

¹⁴Me yan ngorad nge yan i math ko kahol rok fare yam’, me tal fapi pumo’on ni yad be fek fare yam’. Me ga’ar Jesus, “Fachi cha’! Be lungug ngom, mu suwon!”

¹⁵Me suwon fare yam’ ngalang me non, ni aram e ke fulweg Jesus fachi cha’ ngak e chitiningin.

¹⁶Ma gubin e girdi’ nra mudugdaggad, miyad yog e sorok ngak Got ni be lungurad, “Ke yib i m’ug reb e profet ni ba ga’ u fithik’dad!” Miki lungurad, “Ke yib Got ni nge thapeg e girdi’ rok ngak!”

¹⁷Me wear e re bugithin ney ni murung’agen Jesus u urngin yang u Judea nge yungi n’en nib liyeg yu Judea.

¹⁸Pi gachalpen John e rogned ngak John murung’agen e pin’ey ni gubin. Me pining John l’agruw i yad ngar bow ngak

¹⁹me l’oegrow ngak Somol ni ngar fithew ni nge lungurow, “Gur fa’anem ni yog John ni bay yib fa kabay be’ ni ngu’ug son niged?”

²⁰Ma fa’anra bow ngak Jesus me lungurow ngak, “John nma tawfe e ke l’oegmow ni nggu fithew gur ni nge lungumow, Gur fa’anem ni yog John ni bay yib fa kabay be’ ni ngu’ug son niged?”

²¹Ka re ngiyal’ i n’em me golnag Jesus bo’or e girdi’ ko m’ar nge liliy, me tuluf e mo’onyan’ rok bo’or i yad ngar golgad, ma bo’or e girdi’ nib malmit ni chuweg e malmit rorad.

²²Me fulweg ngak fa gali cha’ ni l’oegrow John ngar bow ni ga’ar, “Mu sulow nga mognew ngak John e tin kam guyew nge tin kam rung’agew ni nge lungumew: pi’in malmit e kar guyed ban’en, ma pi’in mugutgut e kar uned ko yan, ma pi’in kar gafgowgad ko m’ar ni daraw e kan be’ech nagrad, ma pi’in biling e ke yag ni ngar rung’aged ban’en, ma pi’in karm’ad e kan fasegrad, ma fare Thin Ni Bfel’ e yibe machibnag ko pi’in gafgow.

²³Rib felan’ e en ndagur maruwar u wan’!”

²⁴Ma fa’ani sul fa gali cha’ ni l’oegrow John, me weliy Jesus murung’agen John ngak fapi girdi’ ni aram urngirad ni ga’ar, “Fa’an mmarod ngak John nga daken e ted, ma mang e mfineyed ni bay mu guyed? Ba gaf i pan ni be buguy e nifeng?

²⁵Mang e mmarod ni ngam guyed? Be’ nike yin’ e mad nrib tolang puluwon? Pi’in karon’ed e mad ni aram rogon ma yad be adbey e salpiy u rogon e par ni yad be tay e yima pir’egrad u tafen e pilung i yan!

²⁶Mogned ngog, mang e um fineyed ni bay mu guyed? Ba profet? Er rogon, nggog ngomed ni kam guyed be’ ni ka ba ga’ ngak ba profet.

²⁷Ya John e eram fa’anem ni yog e babyor nib thothup murung’agen ni ga’ar, I ga’ar Got, ba’aray e mol’og rog; bay gu l’oeg nge m’on rom nge bing e kanawo’ rom.”

²⁸Me ul ul Jesus ngay nge ga’ar, “Nggog ngomed, ni John e dariy be’ ni kan gargeleg ni ba ga’ ngak; machane en ni ir e th’abi sobut’ u fithik’ e gagiyeg rok Got e ka ba ga’ ngak John.”

²⁹Ma urngin e girdi’ nge pi tamukun tax nra motoyilgad ngak; miyad nang ni tin nike yog Got ni ngan rin’ e bmat’aw, me tawfe nagrad John.

³⁰Machane pi Farise nge pi tamchib ko Motochiyel e dar folgad ko tin nike finey Got ni fan ngorad, miyad siyeg ni nge tawfe nagrad John.

³¹“Ere susun e mang e ra gu ta’reb rogonnag e girdi’ ko bin daba’ e rran ngay? Yad bod e mang?

³²Yad bod e bitir ni kar pired nga but’ ko gin ni bay e market riy, ni be tolul ba ulung i yad ngak ba ulung i yad ni be lungurad, ‘Kug chubeged e musik ni yima tay ko m’agpa’ ni fan ngomed, ma da mu churu’gad! Ma ku gon’ed e tang ni yima tay ko gum’eyag, ma da mu yorgad!’

³³Me yib John nma tawfe, mi i par yungiyal’ nike pag e abich ma der unum e wayin, me lungumed e be’ nib aliliy!

³⁴Me yib e en ni Fak e Girdi’ mi i abich ma be garbod me lungumed, ‘Mu guyed e re mo’on nem! I ir e be’ nib ta’abich mma unum e wayin, me ir e fager rok e pi’in ntamukun tax nge pi’in ndabuy dakenrad u lan binaw!’

³⁵Machane gonop rok Got e ke m’ug nib riyul’ rok e pi’in kar folgad riy.”

³⁶Ba Farise e non ngak Jesus ni nge un ngak ngranow nga tabinaw rok ngar abichgow. Me yan Jesus nga tabinaw rok nge yan i par nga but’ ni nge abich.

³⁷Ma bay be’ ni bpin u lan e re binaw nem ni be’ nrib tadenen. Me rung’ag e re pin nem ni be abich Jesus u lan e naun ko re Farise nem, me ere fek ba rume’ nni ngongliy ko alabaster nib sug ko florida

³⁸me yib i sak’iy u keru’ Jesus u to’oben e rifrif u ay, ngi i yor nge munurnag e rifrif u ay Jesus ko lu’ rok. Me faley nga piyan lolugen, me mu’ me faray e rifrif u ay me pu’og fare florida nga daken rifrifen ay Jesus.

³⁹Ma fare Farise ni ir e pining Jesus nge yib, e fa’ani guy e ren’em, me ga’ar u wan’, “Fa’anra riyul’ nre mo’on ney e ba profet, ma kenang ko mini’ e re pin ney ni be math ngak, ma kenang e re mit i ngongol nib kireb nma ngongliy!”

⁴⁰Me ga’ar Jesus ngak, “Simon, bay ban’en ni gub adag ni nggog ngom.” Me ga’ar Simon, “Tamchib, mog ngog.”

⁴¹Me tabab Jesus ngay ni ga’ar, “Immoy l’agruw i mo’on nra tew e malfith ni salpiy ngak be’ nma pi’ e salpiy ko girdi’ ngan maruwel ngay nge mu’ mi ni fulweg: bagayow e lal mir’ay e salpiy ni wasey nib silber e tay ngak ni malfith ma bagayow e wugem.

⁴²Dariy bagyow ni ku rayag rok ni nge thang ngak, ma aram me thang e malfith rorow ni yow l’agruw u lan babyoren e malfith. Ere mini’ e arorow nrib gel feni t’uf e cha’nem rok?”

⁴³Me fulweg Simon ni ga’ar, “Gu be finey ni facha’ ni bo’or e malfith rok nthang u babyor.” Me ga’ar Jesus ngak, “Re fulweg nir ni kam pi’ e bfel’.”