LUKU 7:36-44

³⁶Farisi ke Yesu sìsi à su à pↄ́ ble kãao. Yesu gɛ̀ɛ a bɛa, akũ àtɛn pↄ́ ble gɛngɛsɛkɛna.

³⁷Nↄgbɛ̃ dàvãnide ke kú wɛ̃tɛ pìi gũn. Kũ à mà Yesu tɛn pↄ́ ble Farisi pì bɛa, akũ à gɛ̀ɛ gwe kũ kpáluba fítinnao kũ nísi gbĩ nnao kú a gũn.

³⁸À zɛ̀ a kpɛ a gbá sarɛ, àtɛn ↄ́ↄ dↄ. A wɛ́tɛ̃ tɛn tↄ̃ a gɛ̀sɛkpɛa, akũ àtɛn wara kũ a mìkão, à lɛ́ pɛ̀pɛ a gbáa, akũ à nísi gbĩ nna pìi kùa.

³⁹Kũ Farisi kũ à a sìsi pìi è lɛ, akũ à pì a swɛ̃̀ɛ gũn: Tó gbɛ̃ pì bi annabiimɛ, de à nↄgbɛ̃ kũ àtɛn ↄ naa dí taka dↄ̃̀, kũ dàvãnidemɛ.

⁴⁰Akũ Yesu pì Farisi pìinɛ: Simↄ, má yãke vĩ mà onnɛ. Simↄ pì: Ǹ o, Dannɛri.

⁴¹Yesu pì: Ɔgↄdakɛri ke mɛ́ à kun, gbɛ̃nↄn planↄ a fĩna kũna, gbɛ̃ do andurufu ↄgↄ wàa pla kpɛ́ basↄↄro, gbɛ̃ do sↄ̃ ↄgↄ bupla akuri.

⁴²Kũ ò pↄ́ke vĩ ò fĩna booro, akũ à tòńnɛ ń pla ń pínki. Ń tɛ́, dí mɛ́ anigↄ̃ yei de a dakelaa?

⁴³Simↄ wèa à pì: Matɛn da gbɛ̃ kũ ò tònɛ kũ ↄgↄ zↄ̃kↄ̃ↄomɛ. Yesu pìnɛ: N we mana.

⁴⁴Akũ Yesu arɛ dↄ̀ nↄgbɛ̃ pìia, à pì Simↄnɛ: N nↄgbɛ̃ pìi è yá? Kũ ma gɛ̃ n bɛa, ńdi í kpáma ma gbá pìpiro, akũ nↄgbɛ̃ pì ma gbá pìpi kũ a wɛ́tɛ̃o, à wàra kũ a mìkão.