Luku 3:6-18

⁶ana mika vahe'moza Anumzamo'ma tahokema heazana kegahaze. (Aisa 40:3-5)

⁷Higeno Joni'a, agrite'ma mono ti frerantesie hu'za e'naza vahe krerfa, anage huno zamasmi'ne, tamagra ha' osifave'mofo mofavre nagare! Aza hanigetma Anumzamofo rimpa hezampintira korera fregahaze?

⁸E'ina hu'negu, tamagrama tamagu'ama rukrehema hu'nenutma knare tamavutmava hinkeno hago zmagu'a rukrehe hu'naze hu'za hugahaze. Tamagra agafa hutma Abrahamu'a tagri nerageho mani'ne huta osutfa hiho. Na'ankure tamagri'ma neramasmuana, Anumzamo'a amne ama haveramintetira Abrahamuna mofavrea erifore humigahie.

⁹Menina hago sasumemo'a zafa antaginaku agafafi kriri'ne, hagino anampintima knare ragama reontesia zafa antagino tevefi asaga huno kregahie.

¹⁰Hige'za ana vahe kevumo'za Jonina anage hu'za antahige'naze. Hagi tagra na'a hugahu'ne?

¹¹Hu'za antahi'gageno, Joni'a, zamagari kenona anage huno zamasmi'ne, azagama tare kenama ante'nesamoka, magora onte'nesimofo ome fako humio, hagi azagama ne'zama ante'nesamoka, anazanke hunka fako huzamio.

¹²Takisi zago zonegiza vahe'mo'zane, ti frerantegahie hu'za enamoza'nena, Jonina anage hu'za antahige'naze. Rempi huzami nemoke, tagranena nankna hugahune?

¹³Agra anage huno zamasmi'ne, kvamo'ma eriho hu'nesia kana arugateretma mago'ene zgoa zo'onkiho.

¹⁴Anante mago'a Sondia vahemo'za antahige'naze, Hagi tagaranena na'a hugahune? Hzageno Joni'a anage huno zamagrira zamasmi'ne, Vahe'mokizami zagoa tutu huzamanteta havigereti rezmataga hutma e'oriho. Hagi tmarimpa fru hutma mizantami erifatgo hiho.

¹⁵Anagema hianke vahe'mo'za nentahi'za, Joninkura Kraisi hago ama e'nefi nehu'za, tare tagufa zamagesa antahi'naze.

¹⁶Joni'a mika'mokizmi kenona anage hu'ne, nagra amane tintafanteti fre'neramantoe. Hianagi magoma ne'emo'a nagrira nagatereno tusi hihamu'ane ne' egahie. Nagra amuha osu'noankina Agari aganomofo nofira katu ofegahue. Agra mono tina Ruotage Avamuteti'ene, tevereti'ene freramantegahie.

¹⁷Agra witi eri herahehu fokua azampi eri'no, witi hona'a hare kuma harafi nehuno, nena'a witi ante nompi eri'nenteno, hona'a vga ore tevefi kre fanene hugahie.

¹⁸Ana huno amanahu kante, Joni'a rama'a knare antahintahi erinteno, vahera knare musenkea zamasmi'ne.