Lucas 3:6-18

⁶Iemona nana naɨraɨ Juzíñamui caɨmo orelle jílloillɨfuemo comécɨidiaɨoɨ.”

⁷Comɨnɨ Juan dɨne íaɨoɨ báutizailla llezica, afémɨe íaɨoɨna daɨde: —¡Tɨtade jaiónɨaɨmona comuídɨno izóidɨomoɨ! Ja áɨnozide duere zefuíllɨfuemona omoɨ botállena, ¿bu omoɨ llua?

⁸Omoɨ comecɨ ifue méidoiacanana ñúefuedo uáfodo jino ácatari. Danɨ ómoɨmona táɨnona “Abrahámona comuídɨnodɨcaɨ” daɨíñeno iri. Mei bie nofɨ́cɨaɨmona Juzíñamui jitáiadɨ, Abraham comɨ́nɨna comuítaredeza, daɨí ómoɨna daɨdɨcue.

⁹Fɨénide amena tɨéllena jata jicaɨda jóonia izói fɨénidɨno duere fɨnoille jae ñue mameca. Nana fɨgo llɨzíñede amena iraimo zocana uillano jobaica. (Tɨéfɨrega izóidɨomoɨ.)

¹⁰Jira comɨnɨ afémɨemo jɨcánotiaɨoɨ: —¿Mei bie nɨɨe izói íredɨcaɨ? —daɨdíaɨoɨ.

¹¹Jira Juan uai ote: —Mena caifóferoiredɨmɨe, caifófenidɨmɨemo daa írede. Iemo güílleredɨmɨe güíllenidɨmɨemo güíllena fecárede, —daɨde.

¹²Afénomo dáarie gobierno ɨbátaga úcube llɨ́ɨnoraɨnɨ báutizaillena Juaamo jɨ́caɨbitiaɨoɨ. Afémɨemo jɨcánotiaɨoɨ: —Llófueraɨma, ¿mei bie caɨ nɨɨe izói íitɨcaɨ? —daɨdíaɨoɨ.

¹³Jira Juan íaɨoɨna daɨde: —Ocuica uai daɨna baɨmo dama raiñóñeno iri, —daɨde.

¹⁴Iemo dáarie “soldado” daɨna naɨraɨ úiñotɨno Juaamo jɨcánuaɨbitiaɨoɨ: —¿Mei bie caɨ nɨɨe izói íitɨcaɨ? —daɨdíaɨoɨ. Jira Juan íaɨoɨ uai ote: —Jácɨdota, jɨáɨmamona mɨnɨ́cana baɨróñeno iri. Daje izói jácɨdoñeno jɨáɨmamo ie fɨ́noñegafue táɨnona íaɨoɨmo jɨtáñeno iri. Nano omoɨ táɨjɨna ɨba dɨeze uái omoɨ iri, —daɨde.

¹⁵Nana comɨnɨ Juaamo comécɨ idiaɨoɨ. “Nɨbaɨ bímɨe Crístona,” comécɨdo daɨdíaɨoɨ.

¹⁶Mei íadɨ Juan nana afémacɨna daɨde: Mei uáfueza, cue jáɨnoina omoɨ báutizadɨcue. —Mei jɨáɨmɨe ja bite. Afémɨe Juzíñamui Ñuera Joréñodo ómoɨna úicaite. Daje izói iraimo raa ñue zia izói, afémɨe ómoɨna ɨáɨnino ñue fɨ́noite. Afémɨe cue baɨmo rɨ́inorede. Cue bie jamáimɨedɨcueza, afémɨena dama jacɨ́ruiredɨcue.

¹⁷Jabe bíitɨmɨe arroz bíaidɨmɨe izói ja ie llocofe llɨ́icabite. Afémɨe arroz bíamona ícuaɨ oni eneno ua izói, ñúemacɨmona fɨénidɨnona oni eneno óite. Ñúemacɨna ie illánomo ñue éenoite. Mei jɨáɨfodo fɨénidɨcuaɨ izóidɨno zíiñona dúiñeite iraimo jóbaite, —daɨde Juan.

¹⁸Afe bíemona naa aillo jɨáɨe llófuiado Juan ñúefuiaɨ jino comɨ́nɨmo llote.