Luka 3:6-18

⁶I sa o manuša ka dikhen o spasenje savo avela taro Devel.'”

⁷Akava o Jovan vaćerđa butenđe kola iklile te krstini len: “E sapengere čhavalen! Ko vaćerđa tumenđe da šaj te našen tari e Devlesiri xoli savi avela?

⁸Bijanen bijandipa savencar ka mothoven da čače pokajinđen tumen! I ma mislinen dai dovoljno te phenen: 'Amaroi pradad o Avraam.' Phenava tumenđe da o Devel hem akale barendar šaj te vazdel čhaven e Avraamese.

⁹Ače o tover oto sudo e Devlesoroi već vazdime te čhinel o kašta ano koreno. I đijekh kaš savo na bijani šukar bijandipe ka čhinel pe hem ka frdel pe ani jag.”

¹⁰A o narodo pučlja le: “So valjani te ćera?”

¹¹O Jovan phenđa lenđe: “Kas isi duj gada, jekh valjani te del okolese kas nane. A kas isi xajbnase, te ćerel isto ađahar.”

¹²Nesave carinicija da ale te krstini len o Jovan, i phende lese: “Učitelju, so amen te ćera?”

¹³A ov phenđa lenđe: “Ma roden buderi porez okolestar so o zakoni phenela tumenđe te roden.”

¹⁴I nesave vojnici da pučle e Jovane: “A so amen te ćera?” A ov phenđa lenđe: “Nikastar ma len love ađahar so ka mothoven lenđe zoralipe ili so ka tužinen len xovavne hem oven zadovoljna tumara plataja.”

¹⁵A o narodo adžićerđa e Mesija hem sare pučle pe nane li o Jovan o Mesija.

¹⁶Adalese o Jovan phenđa sarijenđe: “Me krstinava tumen panjeja, ali avela o po baro mandar, kase na injum dostojno o dorikha oti obuća te phravav. Ov ka krstini tumen e Svetone Duhoja hem jagaja.

¹⁷Ka šulaj o gumno plo hem ka odvojini o điv tari pleva. O điv ka čhivel pese ki šupa, a i pleva ka tharel jagaja savi na mudarđola.”

¹⁸Esavke da but avera lafija o Jovan phenđa e narodose sar te terini len te pokajinen pe hem vaćerđa lenđe o Šukar lafi.