Luke 3:6-18

⁶Nia daangada huogodoo ga gidee di Hagamouli a God!’”

⁷Nia daangada dogologo ne lloomoi gi John belee babdais. Gei mee ga helekai, “Goodou e hai be nia gihaa! Ma koai ne helekai bolo goodou e mee di llele gi daha mo di hagawelewele o God dela ga dau mai?

⁸Heia nia mee ala e haga modongoohia bolo goodou guu huli gi daha mo godou huaidu, gei hudee daamada e helehelekai boloo, ‘Tadau damana la go Abraham.’ Au e hagi adu gi goodou bolo God le e mee hua di huli nia hadugalaa aanei gii hai nia dama ni Abraham!

⁹Talai gu togomaalia belee hele gi daha nia laagau ala hagalee huwa humalia, e dudu.”

¹⁰Nia daangada ga heeu gi John, “Gimaadou gaa hai di madau aha?”

¹¹Gei mee ga helekai, “Be koai hua e lua ono gahu, geia gi wanga ina di gahu e dahi gi tangada dela dono gahu ai. Koai ana meegai i golo, geia gi haga loholoho ngaadahi gi digau ala e hiigai.”

¹²Hunu gau hagabudu dagitedi ne lloomoi belee babdais, ga heeu gi mee, “Tangada agoago, gimaadou e hai di madau aha?”

¹³Mee ga helekai, “Hudee hagabudu mee laa hongo godou mee ala e donu belee hagabudu.”

¹⁴Hunu gau dauwa ga heeu gi mee, “Gei gimaadou e hai di madau aha?” Mee ga helekai, “Hudee kaina nia bahihadu nia daangada, be e hagahuaidu tangada i di kai tilikai. Gii dohu hua gi godou hui donu.”

¹⁵Nia daangada gu iai nadau hagadagadagagee e hidihidi be John la go di Mesaia.

¹⁶Gei John ga helekai gi digaula huogodoo, “Au e babdais goodou gi nia wai, gei Tangada dela koia e aamua i di au, le e hanimoi i golo. Au e dee tau loo bolo e wwede nia uga o nia suudi o maa. Mee ga babdais goodou gi di Hagataalunga Dabu mo di ahi.

¹⁷Mee dana daawolo hili mee, e wanga nia lii palaawaa gi lodo di hale benebene mee, gei nia gili gaa kili gi lodo di ahi e deemee di made.”

¹⁸Nia ala kai e logo nogo agoago ai a John gi nia daangada i di Longo Humalia bolo gii huli nadau hangahaihai.