Luke 3:6-18

⁶Ma aram e urngin e girdi’ nu fayleng ni bay ra guyed e kanawo’ nike ngongliy Got ni nge thapegrad riy ngak!’”

⁷Mi i yib e girdi’ ni pire’ ni pire’ ngak John nga daken e ted ni nge tawfe nagrad. Me ga’ar ngorad, “Gimed e pi porchoyog nir! Mini’ e keyog ngomed nrayag ni ngam thaygad ko damumuw rok Got ni bayi taw?

⁸Mu rin’ed e ngongol ni nge dag ni kam pi’ed keru’med ko denen ni gimed be rin’. Ma dab umogned romed ni be lungumed, ‘I Abraham e ir e chitamangidad.’ Ya nggog ngomed ni Got e rayag rok ni nge fek e pi malang ney nge ngongliy ngar manged e pi’in owchen Abraham!

⁹Ya tow e kan fal’eg rogon ke par ni nge th’ab e gek’iy u lik’ngin; ni gubin kaen e gek’iy nder yib wom’ngin ni bfel’ e bay nth’ab nganin’ nga mit e nifiy.”

¹⁰Me fith e girdi’ ngak ni lungurad, “Ere mang e nggu rin’ed?”

¹¹Me fulweg ni ga’ar, “Cha’ ni l’agruw kenggin e mad rok e thangri pi’ ba kaen ngak e cha’ ndariy kenggin e mad rok, ma cha’ ni bay e ggan rok e thangri pi’ boch ngak e en ndariy rok.”

¹²Me yib boch e pi’in yad ma kunuy e tax ni ngan tawfe nagrad, miyad fith ngak ni lungurad, “Tamchib, mang e nggu rin’ed?”

¹³Me ga’ar ngorad, “Dab mu kunuyed e tax nge pag urngin ni kanog ngomed.”

¹⁴Miki fith boch e salthaw ngak ni lungurad, “Ma gamad, mang e nggu rin’ed?” Me ga’ar ngorad, “Dab mu feked e salpiy rok be’ u fithik’ e yargel ma dab um t’ared e thin nga daken e girdi’; nge fel’ u wun’med puluwmed ni yibe pi’ ngomed.”

¹⁵Me gel e pagan’ rok e girdi’; miyad tabab i fithrad u murung’agen John, ya yad be finey nsana ir fare Messiah.

¹⁶Me ga’ar John ngorad ni yad gubin, “I gag e gu be tawfe nagmed ko ran, machane be’ nri ka ba ga’ ngog e bay yib, ya gag e ri gub sobut’ ndab gu bung ni nggu pithig togfan e sus rok. Ir e bayi tawfe nagmed ko fare Kan Nthothup nge nifiy.

¹⁷Ma bay talin e maruwel rok ni nge chuweg fiteyru’ urngin wom’ngin e woldug ni grain, me kunukunuy limngun ni yima ngongliy e flowa riy nge tay nga naun rok, me urfiy fapi fiteyru’ u fithik’ ba nifiy ni dabi math bi’id!”

¹⁸Ngiyal’ ni ba’aram ni i machibnag John ngak e girdi’ fare Thin Ni Bfel’, ma bo’or kanawo’en ni i tay ir riy ngak e girdi’ ni ngar piggad ngar folgad ko re thin nem.