Lucas 3:6-18

⁶Nu rese myet ne lo xaa mxaal Dios, xaa koo re xaa lo yalgut. Is. 40:3-5

⁷Gorna lee re myet nzhin rubnis xaa lo xaa, Juan mbezh lo re xaa: —¡Gu nak dii cheen mball wiz! ¿Cho né lo gu nzho mod xonn gu lo yalnayii kwaan né Dios yaad?

⁸Blu mlaa gu naz nawent nu wlipa mbare gu naz lo Dios, zee gakpa gu mod xle cheen tub yag. Nu nawdizht gu yé gu: “¡Lee re be nak dii cheen Abraham!” Nel wlipa na nii na lo gu, Dios nzho mod le axta noka re ke ne gaka dii cheen Abraham.

⁹Lee yibyag nzobla cho lox re yag kwaan nanzaat xle wen, zee choog xaaya nu koo xaaya lo ki.

¹⁰Zee lee re xaa mnabdizh nu nzhé xaa: —¿Cho kwaan nzhaal le nu?

¹¹Juan mkeb nzhé lo re xaa: —Nu loka cho xaa nkano chop naz ler, bzaa gu tub naza lo xaa nankanota, nu loka cho nkano kwaan gaw, bzaa guya lo xaa nyent kwaan gaw.

¹²Noka lak xaa ntop demi kwaan nya naz Roma ngwa lo Juan, zee chubnis Juan xaa, nu mnabdizh xaa lo Juan nu nzhé xaa: —Maestr, ¿cho kwaan nzhaal le nu?

¹³Juan nzhé lo re xaa: —Nebse gunaab gu parota nzhaal kix xaa.

¹⁴Noka mnabdizh lak soldad lo Juan, nu nzhé xaa: —¿Cho kwaan le re nu? Nu lee Juan nzhé lo xaa: —Nakiibt gu kwaan nkano re myet kwaan lajwers, nixa nagaazht gu tub kwaan nawlit tich xaa; nu nebse gok chul lextoo gu kayaa gu re demi kwaan nzhex nka gu.

¹⁵Lee re myet nkambaz nen cho kwaan gak. Nu rese xaa nle xgab chelee Juan nak Xaa Xaal Dios Nabeyy.

¹⁶Per lee Juan nzhé lo re xaa: —Na nchubnis re gu kwaan nis, per tich na nze stub xaa chubnis re gu kwaan Mbi Naban nu kwaan ki. Lee xaa nonra lo na kwaanzee nixa tich xkyelyed xaa nanzhaalt xek na.

¹⁷Lee xaa nzho tub garot yaa koo paj lo nzhobxtil, nu kozhaw xaa nzhobxtil pa ngozhaw xaa re xob xaa, nu lee paj nzhobxtil zek xaa lo ki kwaan tira nanyuyyt.

¹⁸Nu kwaan zyen doo re wdizh ne mzaa Juan kwent chul cheen Dios lo re myet.