Luke 22:33-70

³³Gei Peter ga helekai, “Meenei Tagi, au gu togomaalia e hana madalia Goe gi di hale galabudi, ge e made madalia Goe!”

³⁴Jesus ga helekai, “Peter, Au e hagi adu gi di goe bolo i mua teduu ma gaa wolo boo nei, gei goe ga helekai haga dolu, bolo goe e de iloo Au.”

³⁵Gei Jesus ga heeu gi ana dama agoago, “Dogu madagoaa ne hagau goodou gei digi kae godou mee dugu hadu, nia peege be nia suudi, goodou la gu huaidu adu gi goodou?” Digaula ga helekai, “Deeai, Meenei.”

³⁶Jesus ga helekai, “Gei dolomeenei, tangada dela dana mee dugu hadu, be di peege, la gi kae ina. Tangada dela dana hulumanu dauwa ai, geia gi huia dono gahu mahaa gi daha, e hui dana hulumanu.

³⁷Di Beebaa Dabu e helekai boloo, ‘Mee e dau dalia digau huaidu.’ “Au e hagi adu gi goodou bolo nia helekai aanei le e hai loo gii kila, idimaa, nia mee ala ne hihi i di Au, le e hai loo gii dohu dono hagahonu.”

³⁸Nia dama agoago ga helekai, “Mmada, meenei Tagi, nia hulumanu e lua aanei.” Gei Jesus ga helekai, “Guu dohu!”

³⁹Jesus ga hagatanga i di waahale Jerusalem, gaa hana gi di Gonduu Olib be dana hai nogo hai, gei ana dama agoago guu hula madalia a Mee.

⁴⁰Mee ne dau i di gowaa deelaa, ga helekai gi digaula, “Dalodalo, gi dee too hua goodou gi lodo nia hagamada.”

⁴¹Gei Mee gaa hana gii tanga gi daha mo digaula, gi mada mogowaa be di mogowaa di hudu di hadu, ga dogoduli ga dalodalo.

⁴²Mee ga helekai, “Tamana, be di maa e baba ginai Goe, daawa ina di ibu o di hagaduadua deenei la gi daha mo Au. Gei hagalee go dogu hiihai, go do hiihai le e hai gii hai.”

⁴³Tangada di langi ga haga gida gi Mee, ga haga maaloo aga a Mee.

⁴⁴Mee guu lodo daamaha ge gu dalodalo hagamahi huoloo. Nia hee o maa guu hai be nia madaua dodo e monnono gi hongo di gelegele.

⁴⁵Mee ga duu aga i dana hai dalodalo, gaa hana gi baahi ana dama agoago, gaa mmada, gei digaula e kii, gu paagege i nadau lodo huaidu.

⁴⁶Mee ga helekai gi digaula, “Goodou e kii beleiaha? Noho gi nua, dalodalo, gi dee too hua goodou gi lodo di hagamada!”

⁴⁷Jesus nogo helehelekai hua igolo gei digau dogologo gu dau mai, e dagi mai go Judas, tangada i dilongoholu maa lua a Jesus. Mee ne hanadu gi Jesus gaa hongi a Mee.

⁴⁸Gei Jesus ga helekai, “Judas, ma di hongi dela e wanga ai Tama Tangada?”

⁴⁹Nia dama agoago ala nogo i baahi o Jesus gaa mmada gi di mee dela e hai, ga heeu, “Meenei Tagi, gimaadou ga hai hegau gi madau hulumanu dauwa?”

⁵⁰Gei tangada e dahi digaula gaa tuu gi daha talinga di baahi gau donu o di hege tagi aamua hai mee dabu.

⁵¹Jesus ga helekai, “Deelaa hua, guu lawa go di mee deenei!” Mee gaa bili gi talinga o taane deelaa, guu hai gii hili gi dono lohongo.

⁵²Gei Jesus ga helekai gi nia dagi hai mee dabu, nia dagi aamua hagaloohi di Hale Daumaha, mo nia dagi mmaadua ala ne lloomoi belee kumi a Mee, “Goodou ne lloomoi mo godou hulumanu dauwa mono goloo daaligi dangada be di mee bolo Au tangada hai hala!

⁵³Au nogo i godou baahi i lodo di Hale Daumaha i nia laangi huogodoo, gei goodou digi hai bolo e kumi Au e galabudi. Deenei di godou aawaa belee hai hegau ai, i di madagoaa dela e dagi go di mogobuna o di bouli.”

⁵⁴Digaula gaa kumi a Jesus, gaa lahi gi di hale tagi aamua hai mee dabu, gei Peter ga daudali digaula, e madatanga i daha.

⁵⁵Di ahi gu akaa i tungaalodo di gowaa daahaa hai gabunga, gei Peter gu madalia digau ala e noho i golo e haganiga di ahi.

⁵⁶Tama ahina hai hegau ga gidee ia a mee e noho i golo, geia gaa mmada haga huudonu gi mee, ga helekai, “Taane deenei nogo madalia a Jesus labelaa!”

⁵⁷Peter ga haga de iloo ia, ga helekai, “Di ahina nei, au e de iloo a Mee!”

⁵⁸Nomuli hua, tuai dangada ga modongoohia eia a Peter, ga helekai, “Goe tangada e dahi i digaula labelaa.” Gei Peter ga helekai, “Tangada nei, ma hagalee ko au!”

⁵⁹Holongo di aawaa e dahi nomuli, gei tuai daane ga helekai hagamahi boloo, “E donu bolo taane deenei la nogo madalia a Jesus, idimaa, mee tangada o Galilee labelaa!”

⁶⁰Gei Peter ga helekai, “Taane nei, au e de iloo be goe e helehelekai bolo aha!” Di madagoaa hua dela e helehelekai iei mee, gei teduu daane gaa wolo.

⁶¹Tagi ga huli mai gi muli, gaa mmada haga huudonu gi Peter, gei Peter ga langahia nia mee a Tagi nogo helekai ang gi deia boloo, “I mua hua teduu ma gaa wolo boo nei, gei goe ga helekai haga dolu bolo goe e de iloo Au.”

⁶²Peter gaa hana gi malaelae, mo di dangidangi wawwawe.

⁶³Nia daane nogo hagaloohi a Jesus gu haganneennee Jesus mo di dadaaligi a Mee.

⁶⁴Digaula guu nnoo nia golomada o Maa, ga heeu gi Mee, “Ma koai dela ne hagamaawa Goe!”

⁶⁵Digaula guu hai nadau helekai e logo ala i golo e hagahuaidu a Mee.

⁶⁶Ga hooaga luada, gei nia dagi mmaadua mo nia dagi hai mee dabu, mo digau haga donudonu haganoho la ne heetugi i di gowaa e dahi, ga laha mai a Jesus gi mua digau hai gabunga aamua.

⁶⁷Digaula ga helekai, “Hagia mai, Goe go di Mesaia?” Jesus ga helekai, “Maa au ga helekai adu bolo Au go di Mesaia, gei goodou hagalee hagadonu.

⁶⁸Gei Au ga heeu adu dagu heeu, gei goodou hagalee helekai gi dagu heeu.

⁶⁹Dolomeenei gaa huli gi muli, Tama Tangada gaa noho i baahi gau donu o God Aamua Huoloo.”

⁷⁰Gei digaula huogodoo ga helekai, “Goe go Tama a God?” Gei Mee ga helekai, “Goodou ala gu helekai bolo ma ko Au.”